Qazaqstannyń Premer-mınıstri Asqar Mamın AQSH-qa jumys sapary aıasynda San-Fransısko qalasyna baryp, onda sıfrlyq damý, venchýrlyq qarjylandyrý jáne energetıka salasyndaǵy jetekshi álemdik kompanıalardyń basshylyǵymen kezdesýler ótkizdi. 

Úkimet basshysy Dúnıejúzilik ekonomıkalyq forýmnyń (DEF) «Tórtinshi ónerkásiptik revolúsıa ortalyǵynyń» basshylyǵymen kezdesip,  DEF basqarýshy dırektory R. Samanspen ınovasıalyq tehnologıalardy retteý salasyndaǵy yntymaqtastyqtyń perspektıvaly baǵyttaryn talqylady. 

Kezdesý qorytyndysy boıynsha «Tórtinshi ónerkásiptik revolúsıa ortalyǵy» men «Astana» Halyqaralyq qarjy ortalyǵynyń (AHQO) arasynda Zattar ınternetin (IoT) damytýda strategıalyq áriptestik týraly qujatqa qol qoıyldy, bul 2020 jyly Qazaqstanda tórtinshi ónerkásiptik revolúsıa boıynsha DEF Úlestes ortalyǵyn qurýǵa jasalǵan alǵashqy qadam boldy. Mundaı mekemeler jańa tehnologıalar men ınovasıalyq jobalardyń damýyn júıeli memlekettik qoldaýdy qamtamasyz etýge yqpalyn tıgize otyryp, Izraıl, Úndistan,  Qytaı, BAÁ, Kolýmbıa, OAR, AQSH pen Japonıada jumys isteıdi.

Premer-mınıstr A. Mamın «500 Startups» venchýrlyq qorynyń basshysy K. Saımen kelissóz ótkizdi, onyń qorytyndysy boıynsha «QazTechVentures» AQ qazaqstandyq ulttyq damý ınstıtýtyn «500 Startups» V Jahandyq qoryna qosý týraly kelisimge qol qoıyldy. 

Bul qujat bolashaqta Qazaqstanda Taqyryptyq venchýrlyq qor qurýdy qarastyrady. Joba venchýrlyq qarjylandyrý men ınovasıalyq kásipkerliktiń damýyna serpin beredi, sóıtip, startap kompanıalardy venchýrlyq kapıtalmen qamtamasyz etedi. 

A. Mamınniń «Bright Sphere Investment Group» (BSIG) ınvestısıalyq tobynyń qarjy dırektory S. Ranmen kelissóz qorytyndysy boıynsha Qazaqstandyq tikeleı ınvestısıalar qory (KIDF) men BSIG arasynda 2020 jyly Qazaqstan aýmaǵynda ınfraqurylymdyq jobalardy qarjylandyrý úshin birlesken qor qurýda yntymaqtastyq týraly memorandýmǵa qol qoıyldy. 

Anyqtama: BSIG – jetekshi ǵalamdyq ınvestısıalyq top, onyń basqarýynda $200 mlrd-tan astam qarjy bar. 7 basqarýshy kompanıa arqyly 30 elde jobalardy iske asyrady, álem boıynsha 20 keńsesi jáne 850 ınstıtýsıonaldyq jáne iri korporatıvtik klıentteri bar. 

Qazaqstanda ınovasıalyq ekojúıeni, venchýrlyq kapıtal men startap jobalardy damytý máseleleri A. Mamınniń «Plug and Play» kompanıasynyń basshylyǵymen áńgimesi barysynda qarastyryldy, onyń keńsesin «Astana Hub» alańynda ashý kózdelgen. 

Úkimet basshysy «C3.ai» kompanıasynyń bas atqarýshy dırektory T. Sıbelmen kelissóz kezinde QR munaıgaz jáne basqa da sektorlarynda jasandy ıntellektini qoldanýda yntymaqtastyq máselelerin talqylady. 

«Cisco» transulttyq kompanıasynyń prezıdenti G. Dıdrıhpen kezdesýde «Sıfrlyq Qazaqstan» memlekettik baǵdarlamasynda bekitilgen maqsattarǵa qol jetkizýde jáne aqparattyq tehnologıalar salasynda yntymaqtastyqtyń jańartylǵan strategıasyn iske asyrý máseleleri qaraldy. 

«One Web» kompanıasynyń bas atqarýshy dırektory A. Shtekelmen kezdesý barysynda Qazaqstannyń aýmaǵyn, onyń ishinde shalǵaıdaǵy jáne jetý qıyn aýdandardy jerseriktik baılanys arqyly jappaı jyldamdyǵy joǵary keń jolaqty ınternetpen qamtý jobasyn iske asyrý perspektıvalary qaraldy. Kelissóz qorytyndysy boıynsha AHQO Basqarýshysy Q. Kelimbetov jáne «One Web» basshysy A. Shtekel jobany odan ári ilgeriletý týraly qujatqa qol qoıdy. 

«Chevron» korporasıasynyń barlaý jáne ken óndirý jónindegi atqarýshy vıse-prezıdenti D. Djonsonmen áńgimelesý kezinde Bolashaq keńeıtý jobasy, «Teńizshevroıl» jobasynda taýarlar men kórsetiletin qyzmetter boıynsha qazaqstandyq qamtýdy odan ári arttyrý, sondaı-aq qazaqstandyq jumyskerlerdiń áleýmettik qamsyzdandyrylýy men eńbek jaǵdaılaryn jaqsartý boıynsha birlesken sharalar ázirleý máseleleri talqylandy. 

«ValvTechnologies» kompanıasynyń prezıdenti K. Hantpen kelissóz barysynda Qazaqstanda munaıgaz sektory úshin klapandar men tıekter shyǵarý zaýytyn ashý múmkindigi qaraldy. Shyǵarylǵan ónimdi bolashaqta «Teńizshevroıl»-dy keńeıtý jobasyn iske asyrý aıasynda paıdalaný, sondaı-aq kórshiles elderdiń naryqtaryna eksporttaý josparlanǵan. 

A. Mamın «42» kompúterlik baǵdarlamalaý mektebiniń jáne İT salasyndaǵy «Qwasar» bilim berý kompanıasynyń negizin qalaýshy K. Iamgnanemen kezdesý ótkizip, onymen Qazaqstannyń sıfrlyq ekonomıkasy úshin mamandar daıarlaýdaǵy yntymaqtastyq perspektıvalaryn talqylady. 

Premer-Mınıstr «Tesla» kompanıasynyń keńsesi men zaýytyn aralady, onda kompanıa basshylyǵymen kezdesý aıasynda Qazaqstanda janar-jaǵarmaı quıý stansıalary jelisin keńeıtý jáne elektromobılder úshin servıs ortalyqtaryn ashý máseleleri qaraldy.