Búgin Almatydaǵy Pedıatrıa ortalyǵynda medısına ǵylymdarynyń doktory, profesor, Pedıatrıa jáne balalar hırýrgıasy ǵylymı ortalyǵynyń Bas ǵylymı qyzmetkeri, QR Eńbek sińirgen dárigeri Habıjanov Bolat Habıjanulynyń 80 jyldyǵyna oraı saltanatty jıyn bolyp ótti.

Jıynǵa ortalyqtyń basshylyq quramy, dárigerler men qyzmetkerler, ǵalymnyń dostary men áriptesteri, sonymen qatar shákirtteri qatysyp, mereıtoı ıesin mereıli jasymen quttyqtady. Júrekten shyqqan aqjarma tilekterin arnap, qushaq-qushaq gúl shoqtaryn tabys etip, syıqurmet kórsetti. 

Saltanatty jıynǵa arnaıy qatysqan S.J.Asfendıarov atyndaǵy Qazaq ulttyq medısına ýnıversıtetiniń rektory Talǵat Nurǵojın mereıtoı ıesiniń densaýlyq salasyna sińirgen eńbegin atap ótip, qoǵamdyq densaýlyqty damytýǵa jáne Qazaqstan respýblıkasynyń densaýlyq saqtaý júıesin nyǵaıtýǵa qosqan úlesi úshin Bolat Habıjanulyn «Ýnıversıtet maqtanyshy» tósbelgisimen marapattady. Oqý oryn basshysy quttyqtaý alǵy sózinde sondaı-aq ardaqty ustaz oqý orynnyń "Altyn" kitabyna enetindigin jáne Bolat Habıjanulynyń esimi ýnıversıtettiń "Dańq" aleıasyna jazylatyndyǵyn atap ótti.

Bolat Habıjanuly sonymen qatar, halyqtyń ómiri men densaýlyǵyn saqtaýǵa sińirgen abyroıly eńbegi úshin Ulttyq Medısınalyq qaýymdastyǵynyń joǵary marapaty – «Altyn dáriger» medalimen marapattaldy.

Shara barysynda mereıtoı ıesin sondaı-aq, "Qazaq medısınalyq úzdiksiz bilim berý ýnıversıtetiniń" ujymy, «Astana medısına ýnıversıteti» ujymy men ár oblystan kelgen shákirtteri men áriptesteri quttyqtady.

Jıyn barysynda Pedıatrıa jáne balalar hırýrgıasy ǵylymı ortalyǵynyń basshysy Rıza Boranbaeva Bolat Habıjanulynyń qyzmet joly men ortalyqqa sińirgen eńbegin atap ótip:  «Qurmetti Bolat Habıjanuly! Biz Sizdi maqtan tutamyz. Sizdiń jemisti eńbegińizge, sırek kezdesetin basqarýshylyq qasıetińizge, belsendiligińizge, atqaryp jatqan ıgi isterińizben, pedıatrıa salasyna bilikti mamandar daıyndaý isine qosyp jatqan úlesińizge tántimiz. Sizdiń Qazaqstan pedıatrıasy salasyna sińirgen eńbegińiz orasan zor. Shyn júrekten Sizge zor densaýlyq, otbasyńyzǵa baqyt, balalar saýlyǵy jolyndaǵy qyzmetińizge mol tabys tileımiz!», – dedi.

Muǵalim men dáriger – bul adamdarǵa densaýlyq pen bilim beretin eń mańyzdy jáne eń qurmetti mamandyqtar. Bul eki mamandyq Bolat Habıjanulynyń ómirinde jemisti qabysa bildi. Ǵalymnyń uzaq eńbek joly búgin de jemisti jalǵasyn taýyp keledi. Uzaq jyldar boıy alǵan bilimi men jınaǵan tájirıbesin jastarǵa úıretýden sharshamaı keledi. Bar ǵumyryn balalar densaýlyǵyna arnaǵan, qurmetti oqytýshy-professor Bolat Habıjanulynyń basty jetistigi – san myńdaǵan qutqarylǵan ómir, myńdaǵan alǵys pen rızashylyq júrek, búginde dáriger atanyp otyrǵan, ónegesi men jolyn jalǵastyrar myńdaǵan shákirtteri.

«Ǵalymnyń haty ólmeıdi» desek, Bolat Habıjanulynyń júzdegen zertteý jumystary, ǵylymı eńbekteri, «Pedıatrıa» men «Kardıorevmatologıa»  salasynda qazaq tilinde jazylǵan  oqýlyqtary jas mamandar, jas urpaq úshin máńgi qundy mura bolyp qalmaq.

«Pedıatrıa jáne balalar

hırýrgıasy  ǵylymı ortalyǵy»

baspasóz qyzmeti