Búgin, 19 jeltoqsanda Nur-Sultanda jýrnalıser suraǵyna jaýap bergen Atyraý oblysynyń burynǵy ákimi Nurlan Noǵaev 2016 jyly jerdi sheteldikterge jalǵa berýge qarsy Atyraýda ótken mıtıńide jergilikti belsendi Maks Boqaev pen Talǵat Aıanǵa bergen ýádesin oryndaǵanyn aıtqan edi. Noǵaev jýrnalıserge "Men Talǵat Aıan men Maks Boqaevqa bergen ýádemdi oryndadym. Men olarǵa mıtıń materıaldary boıynsha qylmystyq qýdalaýǵa ushyramaıtynyn aıttym jáne sózimde turdym.  Olar  Qylmystyq kodekstiń basqa baby boıynsha jaýapqa tartyldy" dep málimdegen. 

Atyraýda jerdi sheteldikterge jalǵa berýge qarsy mıtıńini uıymdastyryp, keıin sol úshin sottalyp shyqqan qoǵam belsendisi Talǵat Aıan Noǵaevtyń málimdemesine qatysty áleýmettik jeli arqyly jaýap berdi. Aıan Youtube-taǵy arnasyna júktegen vıdeoda Noǵaevtyń sózderi shyndyqqa janaspaıtynyn, Maks Boqaev pen óziniń ústinen qozǵalǵan iste "mıtıń ótkizý zańdaryn buzdy" degen aıyptaý bolǵanyn aıtty. 

"Búgin Nurlan Noǵaev 2016 jyly alańda bergen ýádemde turdym dep aıtypty. Esterińizge sala keteıin, 2016 jyly 24 sáýirde Atyraýdaǵy "Mahambet" alańynda "Jerimiz sheteldikter satylmasyn, jalǵa berilmesin" degen talappen mıtıń bolǵan. Sol jerge bılik atynan kelgen Nurlan Noǵaev halyqqa, bizge "eshkim qýdalanbaıdy, eshkim sottalmaıdy" dep ýáde bergen. Endi qazir sol ýádemde turdym dep suhbat berip jatyr eken. Men muny jalǵan dep esepteımin. Ol kisi ýádesinde turǵan joq. Sebebi Maks Boqaev áli túrmede otyr. Ózim eki jyl otyryp shyqtym. Nurlan Noǵaev jýrnalıserge bergen suhbatynda "olar basqa bappen sottaldy" dep aıtypty. Eger meniń sot úkimime nazar aýdaratyn bolsańyzdar, bizdi 174, 274 jáne 400-bap boıynsha sottady. Onyń ishinde 400-bap – "mıtıńini zańsyz uıymdastyrý" degen bap. Iaǵnı, bizdiń sot úkimimizde 24 sáýir kúni "Isataı men Mahambet" alańynda jasaǵan mıtıńimiz úshin, sol mıtıńide sóılegen sózimiz úshin, sol mıtıńige shaqyrǵan úshin sottaldy dep aıqyn jazylǵan" – deıdi Talǵat Aıan. 

Qoǵam belsendisi "Noǵaevtyń bergen ýádesinde tura almaǵy úshin kinási joq bolǵanymen, "Ýádemde turdym" dep jalǵan aqparat taratýdyń qajeti joq" dep esepteıtin aıtty. 

"Árıne, bizdi sottaǵan Noǵaevtyń jeke ózi emes. Bizdi sottaǵan – sot bıligi. Bul – naǵyz saıası sheshim boldy. Bizdi sottaǵan, tipti, sot emes, bizdi sottaǵan – Aqorda. Biraq Noǵaevtyń bul jerde kinási bolmasa da, "Men ýádemde turdym" dep jalǵan aqparat taratýdyń qajeti joq" – dedi Aıan. 

Keshe, 18 jeltoqsanda prezıdent Qasym-Jomart Toqaevtyń jarlyǵymen Nurlan Noǵaev Atyraý oblysy ákimi qyzmetinen bosatylyp, energetıka mınıtri bolyp taǵaıyndaldy.  Noǵaev 2016 jyldyń naýryzynan beri Atyraý oblysy ákimi qyzmetin atqardy. Ol ákim bolyp taǵaıyndalǵan soń birneshe aıdan keıin Atyraýda halyq jerge qatysty mıtıńige shyǵyp, bılikten jerdi sheteldikterge jalǵa berýge qarsy bolǵan. Noǵaev sol kezde narazylarmen kezdesip, "mıtıńige qatysqandar qýdalanbaıdy" dep sendirgen. Biraq keıin Atyraýdaǵy jer mıtıńisine qatysqan Maks Boqaev pen Talǵat Aıan "áleýmettik arazdyq týdyrdy", "jalǵan aqparat taratty" jáne "mıtıń ótkizý zańdaryn buzdy" degen aıyppen bes jylǵa sottalǵan. 2018 jyly sot Talǵat Aıannyń túrmeden ýaqytynan buryn bosatý týraly ótinishin qanaǵattandyryp, onyń jazasyn shartty túrge almastyrǵan. Maks Boqaev "qamaýdan ýaqytynan buryn shyǵýǵa suranbaıtynyn" aıtqan. Al 2019 jyly shildede Atyraýdaǵy №2 qalalyq soty Talǵat Aıandy jazadan tolyq bosatty.