Búgin, 26 jeltoqsanda Qazaqstannyń ádilet mınıstrligi "Qazaqstannyń demokratıalyq partıasyn" qurǵysy keletin bastamashyl topty tirkedi. Bul týraly Qamshy.kz aqparat agenttiginiń tilshisine bastamashyl top jetekshisi Janbolat Mamaı aıtty. 

Mamaıdyń aıtýynsha, bastamashyl top búgin ádilet mınıstrligine 1120-dan astam adamnyń qoly qoıylǵan qujat tapsyrǵan. Ádilet mınıstrligi qujatty tekserip, olardy tirkeý týraly sheshim shyǵarǵan. 

- Ádilet mınıstrligi Dempartıa qurǵysy keletin uıymdastyrýshy komıtetti tirkedi. Endi bizdiń bastamashyl top eki aıdyń ishinde quryltaı sıez ótkizý kerek. Sodan keıin tórt aıdyń ishinde qol jınaý qajet. Qazirgi zańǵa sáıkes, saıası partıany tirkeý úshin kemi 40 myń adamnyń qoly bolýy shart, – dedi Mamaı. 

16 qazanda jýrnalıs, belsendi Janbolat Mamaı, saıasatker Tólegen Júkeev, jýrnalıs Sergeı Dývanov Almatyda baspasóz jıynyn ótkizip, "Qazaqstannyń demokratıalyq partıasyn" quratyndaryn málimdegen edi. Olar sol kezde partıa qurýdaǵy maqsattary "Qazaqstanda saıası reforma júrgizý. Saıası tutqyndardyń bostandyǵyna qol jetkizý" ekenin aıtqan. 

Demokratıalyq baǵyttaǵy partıa qurǵysy keletin bastamashyl top ókilderi aımaqtardaǵy jaqtastarymen kezdesý barysynda túrli qysymǵa ushyraǵandaryn aıtyp júrdi. 

Qazir Qazaqstanda memlekettik tirkeýde 7 partıa bar. Onyń úsheýi - "Nur Otan", "Aq jol", jáne "Komýnıstik halyqtyq partıanyń" ókilderi Qazaqstan parlamentinde otyr. 

♦Oqı otyryńyz: Janbolat Mamaı: Toqaev ta, Nazarbaev ta popýlızmmen aınalysyp otyr