Keshe eks-prezıdent Nursultan Nazarbaevtyń jıen nemeresi Aısultan Nazarbaev daýly málimdemeler jasady. Ol ómirine qaýip tónip turǵanyn jáne Nursultan Nazarbaevtyń týǵan ákesi, al Darıǵa Nazarbaeva týǵan anasy ekenin aıtqan bolatyn. Keıin áleýmettik jeli qoldanýshylarynyń arasynda Darıǵa Nazarbaeva Nursultan Nazarbaevtyń týǵan qyzy ma degen suraq týyndady. 2019 jyly News.myseldon saıtynda Darıǵa Nazarbaeva Nursultan Nazarbaevtyń týǵan qyzy emes degen aqparat jarıalanǵan. 

"Bir kezderi BAQ-ta Nazarbaevtyń quqyǵy birinshi áıelden esh kem túspeıtin toqaly bar degen aqparat jarıalandy. Stúardessa Gúlnar Rakısheva prezıdenttik ushaqtyń ekıpajynyń quramynda uzaq ýaqyt jumys istedi degen boljam aıtyldy. Nazarbaev ony qatty unatqany úshin Gúlnarmen qarym-qatynasyn bastaǵan. Burynǵy stúardessa aıaqastynan Qazaqstandaǵy eń iri Eır Astana avıakompanıasynyń ıesi boldy. Qyzy dúnıege kelgennen keıin, ol Astana qalasynyń elıtalyq aýdanyndaǵy záýlim saraıdy syılyq retinde aldy. Rakıshevadan týǵan balalary týraly aqparat joq, ony jasyryn ustaýǵa tyrysady. Al Nazarbaevtyń ózi resmı túrde toqaly men jasyrǵan bala-shaǵasy bar ekenin joqqa shyǵardy. Toqal máselesinen keıin de Nazarbaevtyń deńgeıi esh tómendemedi. Keıin Darıǵa Nazarbaevanyń Nursultan Nazarbaevtyń týǵan qyzy emes ekeni belgili boldy", - dep jazylǵan saıtta. 

Sondaı-aq Aısultan Nazarbaev týǵan ákesiniń Nazarbaev, al Darıǵanyń anasy ekenin málimdedi. Keıin ol Darıǵa Nazarbaevanyń Nursultan Nazarbaevtyń týǵan qyzy emes ekenin aıtty. 

Ótken jyly qazannyń 18-i kúni London soty Aısultan Rahatqa bir jyl shartty jaza kesti. Brıtanıalyq BAQ-tardyń jazýynsha, ol 2019 jyly maýsym aıynda brıtan polısıasyna qarsylyq kórsetkeni úshin jaýapqa tartylǵan. Nazarbaevtar otbasy Aısultan Rahattyń Ulybrıtanıada ustalǵany jáne sottalǵany jaıly eshqandaı málimdeme jasaǵan joq.

1990 jyly 26 tamyzda ómirge kelgen Aısultan Nazarbaev – Qazaqstandy 30 jylǵa jýyq úzdiksiz bılep, 2019 jyly naýryzda óz erkimen prezıdenttik qyzmetten ketken (biraq eldegi bıliktiń bir tarmaǵyn ustap otyrǵan)  Nursultan Nazarbaevtyń úlken qyzy Darıǵa Nazarbaeva men Avstrıa túrmeleriniń birinde kóz jumǵan qazaqstandyq sheneýnik Rahat Álıevtiń uly.

Qazaqstandyq aqparat quraldarynyń jazýynsha, Aısultan Rahat bala kezden fýtbolǵa qyzyqqan. 2006 jyly Qazaqstannyń jasóspirimder quramasynyń sapynda Eýropa chempıonatynyń irikteý týrnırine qatysqan. "Chelsı" jáne "Portsmýt" jastar komandalary men qazaqstandyq "Astana" komandasynda oınaǵan.

Ol Ulybrıtanıa koroldiginiń "Sandherst" áskerı akademıasynyń támamdaǵan. Aısultan oqýyn bitirip, Qazaqstanǵa oralǵan soń eldiń qorǵanys mınıstrliginiń barlaý basqarmasynda qyzmet etti. 2017 jyly 7 aıdaı Qazaqstan fýtbol federasıasynyń vıse-prezıdenti qyzmetin atqardy. 

Aısultan Rahat 2013 jyly "QazRomGaz" AQ basshysy, almatylyq "Qaırat" fýtbol klýbynyń qojaıyny Qaırat Boranbaevtyń qyzy Alıma Boranbaevǵa úılendi. 2016 jyldyń jazynda olardyń Amelı esimdi qyz dúnıege keldi.