Biz ǵoı elimizde júrip jatqan júıe men júıesizdik jaıynda habardarmyz. Sondyqtan atqa mingen azamattardyń aýzynan shyqqan árbir sózdiń astarynda ne bar ekenin aqyryndap bajaılaı alamyz. Biraq bizdiń elge bir sheteldik jýrnalıs kelip, kásipkerler men ákimderden suhbat ala qalsa, ne oılaıtynyn bilesiz be? Eń aldymen bul elde elbasynan basqada bas joq eken dep oılaıdy. Rasymen de solaı. Qaıda barmańyz, kimmen sóılespeńiz «Elbasymyzdyń joldaýyna oraı, prezıdentimizdiń usynysy boıynsha, Nursultan Ábishulynyń bastamasymen » dep bastalatyn alǵy sózderin aldyńyzǵa tósenish etedi. Tipti sózdiń solaı bastalǵandyǵyna etimiz úırenip ketkeni sonshalyq, bir otyrysta osy fraza aıtylmaı qalsa, júregimiz alas uryp, eki udaı kúı keshetin bolǵanbyz. Ózdiginen tirligin dóńgeletip, kásip ashpaq bolǵan adamdy taýyp alyp, «siz osy bastamaǵa qalaı keldińiz, sony sóz etseńiz»,- deseń boldy bálege qaldym deı berińiz. Taýdyń túkpirindegi aýyldaǵy toıhana ashqan kásipker de osy sózdi ortaǵa qystyrmasa, maǵan kelińiz. Ákimderdi túsinýge bolady. Olar solaı sóılemegende, kim sóılesin? Kásipkerlerge ne joq? E, kásipkerlerdi de túsinýge bolady. Tasyń órge domalasyn deseń, isiń ońǵa bassyn deseń ákimderdiń qulaǵyńa sybyrlaǵanyn aıtasyń. Onyń úsine jańadan ashylǵan kásiptiń bir jaǵyna shyǵysyp, memlekettik kvota bólinýi úshin de qulaqqa sybyrlanǵan sózdi aıtý kerek bolar. Aıtpaqshy umytyp barady ekenmin, anaý qulaǵan úkimet bar ǵoı, kelmeske ketken-sonyń dáýreninde salynǵan aýrýhanalar men mekteptiń eskirgenin de biz sezbeımiz ǵoı. Eski men jańany ajyrata almaımyz. Elbasy joldaýda eski nysandardy kúrdeli jóndeýden ótkizý kerek dep aıtýy tıis. Biz sonda ǵana álgi frazany aýyzǵa ala otyryp, jóndeý júrgize bastaımyz. Ol ras, kásipkerdiń barlyǵy ondaı emes. Sheteldik ıegerleri bar, alyp kásiporyndar olaı ıligip jatpaıdy. Aqsha aınalymy joǵary kompanıalardyń qulaǵyna sybyrlaýǵa ákimqaralardyń qaýqary jete bermesi anyq. Qalaı aıtsaq ta, kásip ashýdyń kózin endi úırenip jatqan qazaqqa qazaqtyń álimjettigin aıqyn baıqaýǵa bolady. Bul elge kimniń tabany tımeı jatyr. Baıymaq maqsatta asqanasyn ashýǵa túrikter aǵyldy. Munaıdy sorýǵa, baǵaly elementterdi óndirýge Batys pen Shyǵystan antalap kirip jatyr. Kire sala qazaqtyń «marqasqalarynyń» mańdaıynan sıpap, qonaqjaı ekensiń dep qoıady da, qarny jýandaı bastaǵanda murnyn kókke shúıiredi. Sebebi kókke shúıirilgen muryndy endi eshkimniń qanata almasyn jaqsy túsinip alady. Osylaısha bizdiń elde qonaqtar taltań basyp ómir súre alady. Al kásiptiń álippesin ashqan adam álgi sózdi jattap álek bola turady. Ol fraza sonshalyqty jaman emes. Biraq adam úshin eń qasterli uǵymdy qasıetsiz etip túsindirýdiń bir ǵana joly bar. Sol qasıetti uǵymdy kúnine myń márte aıtqyzý. Baıaǵyda jaýgershilik zamanda qolǵa túsken tutqyndy aıamaı soqqyǵa jyǵady eken. Soqqanda da, týǵan jeriniń atyn aıtqyzyp tepkileıtin bolsa kerek. Ózi úshin eń aıaýly uǵymdy aıtqan saıyn soqqy kórgen beıbaq, aqyr sońynda álgi sózden jerine bastaıdy eken. Al qazaqty elbasynan jeritý kimge kerek boldy eken?
Aınur Tóleý
