Kelisimshart boıynsha qyzmet etip júrgen kishi serjanttyń Shymkent mańyndaǵy áskerı bólimnen qarý-jaraq alyp qashqany týraly aqparat áleýmettik jeli men messendjerlerde taralýda. Buǵan qatysty QR Qorǵanys mınıstrliginiń baspasóz qyzmeti resmı málimdeme jasady. 

"Shymkent mańyndaǵy áýe shabýylyna qarsy qorǵanys áskerı bóliminiń birinde kelisimshart boıynsha qyzmet atqaryp júrgen kishi serjant aýysym kezekshisi quramynda bolyp, bólimdi óz erkimen tastap ketken. Dál sol ýaqytta qarýdy saqtaý bólmesinde atys qarýynyń belgili bir sanynyń jetispeýshiligi anyqtaldy. Quqyq qorǵaý organdary men áskerı polısıa kúshteri sarbaz men joǵalǵan qarýdy izdeý, qaýipsizdikti qamtamasyz etý boıynsha qajetti is-sharalardy júrgizýde", – delingen habarlamada.

Áleýmettik jelilerde taraǵan aqparatta Balǵynbaı Abylaı atty áskerı qyzmetshiniń Ordabasy aýdany Badam stansasyndaǵy áskerı bólimnen 30 dana AK-74 avtomatyn, 27 dana PM tapanshasyn, 5,45 mm-lik 400 dana, 8 mm-lik 24 dana oq alyp ketkeni habarlanýda.