21 aqpan kúni keshke "mıtıńige shaqyrdy" degen aıyppen úsh táýlikke qamalǵan Demokratıalyq partıa bastamashyl tobynyń jetekshisi, opozısıalyq saıasatker Janbolat Mamaı eki táýlikten keıin bosap shyqty. Bul týraly Mamaıdyń ózi Facebook paraqshasynda habarlady. 

Mamaıdyń jazýynsha, Qarasaı aýdanynyń prokýrory onyń kishkentaı balalary bar ekenin eskerip, Almaty oblysynyń sotynan jazasyn úsh táýlikten eki táýlikke azaıtýdy suraǵan.  

"Búgin keshke kútpegen jerden jáne meniń jaqyndaryma habarlamasatan taǵy bir sot otyrysy boldy. Meni sotqa jetkizdi jáne sot otyrysy vıdeo baılanys arqyly ótti. Almaty oblystyq soty jazamdy eki kúnge ózgertti. Meni qazir ǵana Qarasaı aýdandyq ishki ister bóliminiń basshylyǵy úıime ákelip tastady. Múmkin erteń bolatyn qoldaýdan qoryqqan shyǵar" dep jazdy Mamaı. 

Úsh kún buryn, 20 aqpanda Janbolat Mamaı azamattardy 22 aqpan kúni saǵat 11.00-de "Astana" alańyna mıtıńige kelýge shaqyrǵan. Sonyń ertesinde, 21 aqpan kúni keshke qaraı Mamaıdy Qaskeleń qalasynda polısıa ustap, Qarasaı aýdandyq ishki ister bólimine jetkizdi. Onyń ustalǵanyna narazy bolǵan jaqtastary 21 aqpan keshki 23.00-den bastap Qarasaı aýdandyq ishki ister bólimniń aldynda ashtyq jarıalap, bılikten ony bostýdy talap etti. Al 22 aqpan kúni tańǵy beste Mamaıdyń "mıtıńige shaqyrdy" degen aıyppen úsh táýlikke qamalǵany belgili boldy. 

31 jastaǵy Janbolat Mamaı Qazaqstanda oppozıalyq belsendi, táýelsiz jýrnalıs retinde tanymal. Ol 2017 jyly "Muhtar Áblázovtyń qarjysyn gazet arqyly zańdastyrmaq boldy" degen aıyppen úsh jyl merzimge shartty jazaǵa kesilip, sot onyń úsh jyl jýrnalısik qyzmetpen aınalysýyna tyıym salǵan edi. Mamaı qazir probasıalyq baqylaýda. 

Ótken jyldyń qazan aıynda Mamaı bastaǵan bir top belsendi bılikke oppozıasıa retinde "Demokratıalyq partıa" quratyndaryn málimdegen. 2019 jyly 26 jeltoqsanda Ádilet mınıstrligi bastamashyl topty tirkegen. Keıin Mamaı 22 aqpanda Almatyda "Dempartıanyń" quryltaıyn ótkizetinin habarlaǵan.​

Al osy jyly 19 aqpanda "Dempartıanyń" bastamashyl toby Almatyda baspasóz máslıhatyn ótkizip, partıa jaqtastaryna qysym jasalyp jatqandyqtan  22 aqpanǵa josparlanǵan quryltaı ótpeıtinin, onyń ornyna "mıtıńige shyǵatyndaryn" málimdegen bolatyn.