Qazaqstan azamattary koronavırýs taraǵan Iran men Ońtústik Koreıa elderinen ázirge evakýasıalanbaıdy. Bul týraly búgin Úkimet baspasóz ortalyǵynda ótken brıfıńte Syrtqy ister mınıstriniń birinshi orynbasary Shahrat Nuryshev málimdedi. 

Onyń sózinshe, qazir Iranda Qazaqstannyń 170 azamaty bar, biraq ázirge olardy evakýsıalaý týraly másele joq. Nuryshev Irandaǵy Qazaqstan elshiligi ondaǵy el azamattarmen tıisti jumys júrgizip jatqanyn,  azamattar Irannan qaıtýdy jón dep sheshken jaǵdaıda mınıstrlik olarǵa tıisti kómekti beretin aıtty. 

Iran densaýlyq saqtaý mınıstrliginiń málimetinshe, Iranda koronavırýstyń taralýy órship tur. Sońǵy aqparat boıynsha, ol jaqta  978 adam vırýs juqtyrǵan. 

Nurshevtyń aıtýynsha, Ońtústik Koreıada Qazaqstannyń 34 myń 600 azamaty bar. Ol jaqqa baǵyttalǵan reıster sany toǵyzdan úshke qysqartylǵan. Koronavırýs órship turǵan Ońtústik Koreıaǵa úsh reıst sol jaqtaǵy Qazaqstan azamattary elge qaıtýdy jón dep sheshse, qaıtyp kelsin degen oımen qaldyrylǵan.

Nuryshevtyń sózinshe, qıyn jaǵdaı týyndasa ǵana Qazaqstan óz azamattaryn evakýasıalaıdy. Al oǵan deıin qaıtýǵa nıetti azamattar ázirge júrip turǵan reıster arqyly elge orala alady. 

Sońǵy málimet boıynsha, dúnıejúzinde qazirge deıin koronavırýs juqtyrǵandar sany 89 myńnan asty.