Jýrnalıs, qoǵamdyq-saıası "JasAlash" gazetiniń burynǵy qyzmetkeri Asqat Asandy 174-baptyń (áleýmettik arazdyqty qozdyrý) birinshi tarmaǵy boıynsha qozǵalǵan qylmystyq is negizinde polısıaǵa shaqyrǵan.

Bul týraly jýrnalıs 5 naýryzda túnde óziniń facebook paraqshasynda habarlady.

"Búgin tergeýshi shaqyrtyp, ústimnen 174 baptyń birinshi tarmaǵy boıynsha, áleýmettik narazylyq týdyrdy degen aıyppen, qylmystyq is qozǵalǵanyn bildim. Jaza – 2 jyldan 7 jylǵa deıin bas bostandyǵynan aıyrý. Oǵan túrtki bolǵan "Jas Alash" gazetinde jaryq kórgen "Eks-prezıdentti ınterpol izdep, suraý salatyn kún týsa..." degen maqalam. Tergeýshi qoıǵan suraqtarǵa jaýap berdim. Jalpy áńgimemiz sypaıy túrde ótti. Maqalany sot-saraptamasynan ótkizýge komısıa qurylǵan kórinedi. Meniń oıymsha, organdardyń túpki kózdegeni Inga Imanbaı sekildi" delingen jýrnalıs jazbasynda.

Alaıda 6 naýryz kúni Azattyq radıosynyń materıalynda maqala avtory kýáger retinde tergelgeni habarlandy.

Asqat Asan men JasAlash gazetiniń burynǵy bas redaktory Inga Imanbaı isti jýrnalısik qyzmetimen baılanystyrady.

Qylmystyq iske negiz bolǵan maqala basylymdy jýrnalıs Inga Imanbaı basqaryp turǵanda shyqqan. Adam quqyqtary jáne zańdylyqty saqtaý búrosynyń saıty jýrnalısi tergeý kezinde "maqalany jazýda Inga Imanbaıdyń róli qanshalyqty boldy" dep suralǵany, oǵan jýrnalıs "ózimniń qalaýym boıynsha jazdym" dep jaýap bergenin habarlandy.

Inga Imanbaıdyń sózinshe, jýrnalıs Asqat Asannyń maqalasy ótkir synǵa, ashshy shyndyqqa toly. "Biraq, ol jerde bir aýyz ótirik joq. Zańǵa qaıshy bir sóılem taba almaısyzdar" deıdi ol.