Densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» baǵdarlamasynyń shapaǵaty Munaılydaǵy Batyr aýylyna tıdi. Beısenbi kúni Batyr selolyq okrýgynda jańa dárigerlik ambýlatorıa ashylyp, el ıgiligine tapsyryldy. Baǵdarlamanyń ıgiligin kórgen  batyrlyqtardyń mereıi ósip, kópten kútken qýanyshqa keneldi.  

Saltanatty sátte oblys ákiminiń birinshi orynba­sary S.Aldashev aýyl turǵyndarynyń qýanyshyna ortaqtasyp, ıgi istiń ilgeri basýyna qutty qadam  tiledi. 

– Búgin el ıgiligine berilgeli turǵan dárigerlik ambý­latorıanyń ashylýymen shyn júrekten quttyqtaımyn! Qazaqstan Táýelsizdik alǵan jyldardan beri Prezıdentimiz N.Nazarbaevtyń basshylyǵymen turǵyndardyń ál-aýqaty men memleketimizdiń órkendeýine baǵyttalǵan júıeli reformalar júrgizilýde. Tek qana Munaıly aýdany qurylǵaly beri  densaýlyq saqtaý salasy boıynsha 8 bastapqy medısınalyq-sanıtarlyq kómek kórsetý ortalyǵy men aýdandyq 1 emhana iske qosyldy. Osy dárigerlik ambýlatorıa aýyl turǵyndaryna sapaly qyzmet kórsetip, halyqtyń medısınalyq kómekke qoljetimdiligin arttyrý jolynda el ıgiligine qyzmet etedi. Mundaǵy biliktiligi joǵary medısına qyzmetkerleri aýyl turǵyndaryna sapaly qyzmet kórsetip, halyq densaýlyǵyn jaqsartý maqsatynda jalyqpaı jumys jasaıdy dep senemiz. Talaıdyń tánine saýlyq, janyna meıirim syılaǵan aq halatty abzal  jandarǵa  halyq  úshin ıgilikti isterińizge sáttilik tileımin» degen Súıindik Tasemenuly medısınalyq mekemege túrli-tústi  teledıdar tartý etti. 

Aýyl turǵyndary atynan sóz alǵan Be­ket atanyń urpaǵy B.Sandybekov sha­ǵyn eldi mekenniń shyraıyn kirgizgen jańa densaýlyq saqtaý nysanyn salyp, qazyna qarjysyn halyq ıgiligine aınaldyrǵan oblys ákimdigine, «Aláns LTD» JSHS dırektory A.Kerelbaevqa sheksiz alǵys aıtyp, kópshilik qaýymǵa aq batasyn berdi. Qurmetti qonaqtar­dyń quttyqtaý lebizderi tolastaǵannan keıin oblys áki­miniń birinshi orynbasary S.Aldashev pen aýyl turǵyny B.Sandybekov jańa ambýlatorıanyń lentasyn qıdy. Aýyl irgesinde tıptik úlgide boı kótergen medısınalyq meke­meniń ishin aralap, kabınettermen tanysty. 

– Qazirgi tańda bolashaǵy bar, ósip-kórkeıip kele jatqan Batyr aýylynda  halyq sany 2700-ge jetti. Onyń ishinde bir jasqa deıingi  80 sábı, 55 júkti áıel bar. Buryn  basy aýyryp, baltyry syzdaǵan Batyr aýylynyń turǵyndary 25 shaqyrym jerdegi Mańǵystaý selosyna baryp, qaralatyn. Ótken jyldan bastap, osy Batyrda feldsherlik- akýsherlik pýnkt ashyldy. Halyq sany ósiminiń artýyna baılanysty dárigerlik ambýlatorıa ashý qajettigi týyndap, jańa medısınalyq mekeme boı kóterdi. Quny 182 mln.bolatyn nysanda sharýashylyq bólmelerin qospaǵanda dárigerge deıingi kabınet, terapevt pen akýsher, tis emdeý, qan alý, nesep taldaý, egý kabınetteri, fızıokabınet, em-shara kabınetteri men 40 adam em alatyn tósek-orny saıly kúndizgi stasıonar bar. Munda eki dáriger men 12 orta býyndy meıirbıke jumys jasaıdy. Tolyqtaı zamanaýı úlgidegi  medısınalyq qural-jabdyqtarmen, qurylǵylarmen jasaqtalǵan. Bıyl «Dıplommen aýylǵa» baǵdarlamasy boıynsha Astana, Almaty, Aqtóbe qalasyndaǵy akademıanyń túlekteri bizdiń aýdanymyzǵa keledi. On eki jas maman tamyz aıynan bastap, aýdanymyzdaǵy medısınalyq mekemelerde jumys jasaıtyn bolady,-deıdi aýdandyq aýrýhananyń dırektory A.Shyrshyqbaev. 

Oblystyq densaýlyq saqtaý basqarma­synyń málimetinshe, bıyl oblysymyzda «Salamatty Qazaqstan» memlekettik baǵdarlamasy  boıynsha 8 medısınalyq mekeme boı kótergen. Sonyń 7-eýi dárigerlik ambýlatorıa bolsa, bireýi  feldsherlik- akýsherlik pýnkt. Sondaı-aq, aldaǵy ýaqytta Qyzan jáne Ómirzaq selolarynda dárigerlik ambýlatorıa ashý josparlanyp otyr eken.   

– Memlekettiń belgilengen normatıvi boıynsha, halyq sany eki myńnan 10 myńǵa deıin bolsa, aýylda dárigerlik ambýlatorıa salynýy qajet. Oblys aýmaǵynda shaǵyn eldi mekenderdiń ulǵaıýyna baılanysty osyndaı medısınalyq mekemeniń irgesin qalap, el ıgiligine tapsyrýdy josparlap otyrmyz. Kelesi jyly Mańǵystaý aýdanyndaǵy  Shetpe-1 shaǵynaýdanynda, Munaılyǵa qarasty Basqudyq aýylynda selolyq emhana  salýdy maqsat etip otyrmyz. Oblysymyzda úsh jyljymaly medısınalyq keshenniń bireýi  oblystyq aýrýhana janynda turatyn. Sonyń bireýin Munaıly aýdanyna berdik. Medısınalyq keshen búgin Batyr aýylynda jumysyn bastady. Aldaǵy ýaqytta keste boıynsha barlyq aýyldarǵa baryp,  halyqqa kómek kórsetedi,-deıdi oblystyq densaýlyq saqtaý basqarmasynyń basshysy R.Bektýbaev.

Derekkózi: Mangmedia.kz.