Ulttyq qoǵamdyq senim keńesiniń múshesi Asqat Sadyrbaı facebook paraqshasynda májilistiń ekinshi oqylymda maquldanǵan beıbit jıyndar týraly zań jobasynyń kóptegen normalary alǵashqy nusqasynan jetildirile túskenin málim etti. Jazba mátiniń tolyq nusqasy tómende usynylǵan.

Bul eń kóp talqyǵa túsken, kóp adamnyń pikiri eskerilgen, ábden elekten ótken zań jobasy desek te bolatyn shyǵar. Bir jaqtan zań jobasy talqylanyp jatqanda, ekinshi jaqtan ártúrli qyzý pikirtalastar oryn alyp, syndar aıtylyp jatty. Bul da durys shyǵar, biraq ózim jýrnalıs bolǵandyqtan kóp jaǵdaıda aqparattyń anyq-qanyǵyna kóz jetkizip almaı turyp, jarym-jartylaı málimetti jalaýlatyp áketýge, orta belden qandaı da bir qorytyndy shyǵarýǵa qarsymyn, quptamaımyn. Zań jobasyna qatysty kóptegen aqparattyń burmalanyp aıtylýyn da kásibılik dep eseptemeımin.

Ulttyq keńestiń múshesi retinde jańa zań jobasy boıynsha jumys toptaryndaǵy talqylaýǵa qatystym. Offlaın talqylaýlar eldegi tótenshe jaǵdaı men karantınge baılanysty aıaqasty onlaın rejımge aýysty. Bul oraıda da muny keıinge qaldyrý qajet edi degen pikirlerdi oqyp qaldym. Menińshe jumysty orta joldan tastap, belgisiz merzimge qaldyrýdyń qajeti joq. Onlaın talqylaýdyń offlaın talqylaýdan asa bir artta qalyp qoıǵan aıyrmashylyǵy boldy dep aıta almaımyn. Kúnde saǵattap baılanysqa shyǵyp otyrdyq. Azamattyq qoǵam ókilderi, zańgerler, depýtattar ózderiniń oılaryn, pikirlerin ashyq aıtty. Kerek jerinde tipti qatty aıtqan kezder de boldy. Biz de óz tarapymyzdan jýrnalıserdiń jumysyn retteıtin normalarǵa qatysty, pıketterdiń máselesi, mıtıń ótkiziletin arnaıy oryndarǵa baılanysty jáne basqa da normalarǵa suraqtarymyz ben usynystarymyzdy aıttyq. Bárimizge sóz berildi. Keıbir pikirtalastar saǵatqa sozyldy. Onyń barlyǵy oń nátıje bergenin jáne osy sózderimdi Ulttyq Keńestegi áriptester Erlan Sairov, Muhtar Taıjan , Marat Bashimov, Murat Ábenov rastaıdy dep oılaımyn. Jumys tobynyń tóraǵasy, depýtat Kanat Mýsın myrzanyń da kásibı eńbegin atap ótkim keledi. Qanshama jan-jaqty, keıde qarama-qaıshy pikirlerdiń barlyǵyn muqıat, sabyrmen tyńdap, bárine ýaqyt úılestire bildi. Eń bastysy osy jumystyń nátıjesi.

Anyǵyn aıtaıyq, jańa zań jobasynyń kóptegen normalary alǵashqy nusqasynan jetildirile tústi. Eskertý ýaqyty qysqartyldy, zańmen tyıym salynbaǵan (qaýipti ınfraqurylym nysandarynyń mańynan ózge) kez-kelgen jerde pıket uıymdastyrýǵa ruqsat berilmek. Jýrnalıserdiń jumysyn retteıtin normalardyń bári derlik alynyp tastaldy.

Túbegeıli jańa zańnan oń nátıje kútemiz.