Búginge deıin 784 myńnan astam almatylyq tótenshe jaǵdaı kezinde tabysynan aıyrylǵandarǵa arnalǵan 42 500 teńgelik járdemaqyǵa ótinim bildirgen. 238 myń turǵynnyń ótinimi keıinge qaldyrylsa, qalǵandaryna áleýmettik tólem taǵaıyndalǵan.

Járdemaqyǵa qoljetkizgenderdiń biri – Ótegúl Qalqamanqyzy. Almatydaǵy Baısat bazarynda oıynshyq satady. Karantın bastalǵaly úıde otyr. "42500 teńge qıyn-qystaý kezeńde halyqqa ájeptáýir qoldaý boldy" degen ol kórsetilgen kómek úshin úkimetke dán rıza.

– Osyndaı istiń júzege asýy úkimette otyrǵan adamdardyń halyqqa degen janashyrlyǵy dep bilemin. Eshqaısymyzdy úıden shyǵarmastan, járdemaqyny kartochkamyzǵa aýdaryp bere qoıdy. Karantın kezindegi qaýipsizdik sharalaryn qatań qadaǵalap, halyqtyń qaýipsizdigin qamtamasyz etip jatqanyn osydan-aq kórýge bolady, – dedi ol.

Ótegúl Qalqamanqyzy járdemaqyny ekinshi ótinimnen  keıin alǵanyn aıtyp, 42500 teńgeniń túsýin tosyp júrgenderdi sabyrǵa shaqyrdy.

– Eń bastysy sabyr saqtap, kútińizder. Tótenshe jaǵdaıǵa baılanysty shynymen de tabysyńyzdan aıyrylyp, jumysyńyz toqtap qalsa, onda járdemaqy mindetti túrde beriledi. Memleket syn saǵatta eshkimdi dalada qaldyrmaıdy. Sondyqtan ýaıymdamaı, karantın talaptaryn oryndap, tosynnan kelgen synaqtan aman-esen ótýge, qalypty ómirge oralýǵa árqaısymyz atsalysaıyq, – deıdi Ó. Qalqamanqyzy.