Qazaqstan Respýblıkasy men Qazaqstan Ulttyq Banki Bank of New York Mellon (budan ári – BNYM) londondyq fılıalynda ornalasqan jarty mıllıard dollardan astam Ulttyq banktiń aqshalaı qarajatyna tyıym salý úshin áreketter jasaǵan eki moldavalyq bıznesmender – Anatol jáne Gabrıel Statıdi taǵy da bir jeńiliske ushyratty, –  dep habarlaıdy ádilet mınıstrliginiń resmı saıty.

"2017 jyldyń qazan aıynda Statı taraby belgıalyq sottardan BNYM-ge joldanǵan atqarý buıryǵyn aldy. Sonyń negizinde BNYM 22 mlrd AQSH dollaryn quraıtyn Ulttyq bank shottaryna tyıym saldy. Ádilet mınıstrligi men Ulttyq bank tyıym salynǵan qarajat somasyn 530 mln AQSH dollaryna deıin tómendetti. 2018 jyldyń 25 mamyrynda belgıalyq sot daýdy sheshý úshin Anglıanyń sotyna silteme jasady. Aǵylshyn soty bul máseleni tórtkúndik sot prosesinde qarap, 2020 jylǵy 22 sáýirde sheshim shyǵardy" delingen aqparattyq habarlamada.

Statı zańgerleri aǵylshyn sotyna 530 mln AQSH dollary mólsherindegi qarajat Qazaqstan Respýblıkasy aldyndaǵy BNYM bereshegin qurap, belgıalyq tyıym salýdy qoldanýdyń aıasyna kiredi dep habarlaǵan.

Sýdıa Tır olardyń dálelderin qabyldamaı, mynadaı sheshim qabyldaǵan:

"(i) Qazaqstan Respýblıkasy BNYM men Ulttyq bank arasyndaǵy jahandyq depozıtarlyq kelisimniń taraby bolyp tabylmaıdy, (ii) jahandyq depozıtarlyq kelisim boıynsha BNYM mindettemeleri tek qana Ulttyq bankke tıesili (Qazaqstan Respýblıkasyna emes), (iii) jahandyq depozıtarlyq kelisimge sáıkes BNYM-niń Qazaqstan Respýblıkasyna aqshalaı qarajatty tóleý boıynsha mindettemeleri joq, (iv) Qazaqstan Respýblıkasynyń jahandyq depozıtarlyq kelisimge sáıkes BNYM depozıtterindegi aqsha qarajatyna qatysty BNYM-ge qandaı da bir talap qoıý quqyǵy joq".

Qazaqstan Respýblıkasynyń Ádilet mınıstri Marat Beketaevtyń sózinshe, úsh jyl buryn bul sot tórelik sheshim Statı tarapynan alaıaqtyq jolmen alyndy dep oılaýǵa jetkilikti dálel bar ekenin anyqtaǵan.

– Qazir sot olar bógde zańdy tulǵanyń aktıvterine tyıym saldy dep qaýly etti. Biz burynǵydaı Statı alaıaqtyǵyna qarsy kúres úshin barlyq qajetti sharalardy olar tańdaǵan árbir ıýrısdıksıada qabyldaýǵa daıynbyz, – dedi mınıstr.