Dúısenbiden bastap Germanıanyń kóp bóliginde qoǵamdyq kólikterde jáne dúkenderde betperde kıý mindetti bolady. Keıbir aımaqtarǵa bul erejeni buzǵandarǵa aıyppul salynady. Bul týraly Qamshy tilshisi shetel basylymdaryna sholý jasap habarlaıdy.

Germanıa ótken apta pandemıaǵa qatysty keıbir shekteý sharalaryn alyp tastady. 800 sharshy metrden aspaıtyn dúkenderdi qaıta ashýǵa ruqsat etildi. 

CNN jáne NPR aqparaty boıynsha, Germanıada betperde kımegender úshin 15 eýrodan 5000 eýroǵa deıin aıyppul salynýy múmkin. Al brıtanıalyq The Sun gazetiniń jazýynsha, aıyppul 10 000 eýroǵa deıin bolady. Alaıda ereje Germanıanyń federaldy aımaqtarynda ár túrli. 

Germanıa koronavırýs tirkelgen jaǵdaılar sany boıynsha álemde besinshi orynda. Germanıada azamattarǵa eki adamnan kóp jınalýǵa bolmaıdy. Sondaı-aq kópshilik sharalardy boldyrmaıtyn qatal áleýmettik erejeler engizilýde.