Kásipker, bıznes-trener, Bıznes bastaý kásipkerlik mektebiniń jetekshisi Ahmetbek Nursıla saıası partıa quratynyn málim etti. Ol bul týraly facebook paraqshasynda habarlady.

Kásipker óziniń oqyǵany, toqyǵany bar ekenin aıtyp, bunysy qara basynyń qamynan aspasa, onda "aty óshkir" bolǵanym ǵoı" deı kele, buǵan deıin tyndyrǵan isteri týraly aıtyp ótti.
⠀
"Oqyǵanym, bilgenimdi halyqtyń ıgiligine jaratý úshin depýtattyqqa barsam degen oıym bar. Men ne bilemin?
⠀
1. 1982 jyldan bastap óndiris oryndarynda istedim. Qarapaıym ustadan seh bastyǵyna deıin kóterildim;
⠀
2. 1991 jyldan bastap kásiptemin. Shujyq óndirý, ton óndirý, jıhaz óndirý, qymyz óndirý salalarynda istedim. Taksopark, túıe, jylqy ósirý salasynda biraz sátsiz jobalarym da boldy;
⠀
3. Italıan, Túrik kásipkerlerimen tyǵyz baılanysta boldym. Amerıka, Kanada elderinen myqty keńesshilerden sabaq aldym;
⠀
4. Ekonomıka salasyn jaqsy kórip oqımyn, túsinemin;
⠀
5. Keıingi 5 jyl kásipkerlerdi daıyndaýmen aınalysyp júrmin.
⠀
Osy jınaǵan bilimderim men tájirıbelerim maǵan "parlamentke" baryp, elimizdiń damýyna jaqsy áserin beretin zańdardy qabyldaýǵa septigi tıedi dep oılaımyn.
⠀
Árıne saıasat salasynda sondaı bilimim joq. Jáne de saıasat meni sondaı qatty qyzyqtyrmaıdy da. Kezinde Ǵalymjan Jaqıanov dosymnyń ótinishimen DVK-nyń mıtıńilerinde sóılegenim ras. Ol azamatty men syılaımyn, qazaqtyń rýhy synbaǵan bir batyry dep sanaımyn. Biraq saıası kózqarasymyz birdeı emes. Maǵan eldiń tynyshtyǵy, berekesi kerek" dep jazdy Ahmetbek Nursıla.
⠀
Ol búginde "prezıdent durys baǵyt ustanyp, halyqtyń kóńilinen shyǵatyn is-áreketter jasap jatyr" dep sanaıdy. Biraq bári keremet bolyp ketti, "jasasyn prezıdent" deýden de aýlaq.

"Eshqashan TJ (Taban jalaǵysh) bolyp kórgem joq, qalǵan ómirimde bola qoımaımyn dep oılaımyn. Kerek kezinde ókimetti synap, tekserip, qatelikterin kórsetip, halyqtyń talabyn jetkizip otyra alatynyma senimdimin.
⠀
Sondyqtan parlamentke baryp elimniń órkendeýine septigimdi tıgizgim keledi. Biraq ol úshin partıa atynan túsýim kerek. Bir partıanyń atynan baratyn bolsam, onda olardyń aıt degenin ǵana aıtatyn qol jaýlyq bolamyn ǵoı. Men ondaı bolǵym kelmeıdi.
⠀
"Óz partıamdy qursam qalaı bolady" dep dos-tanystarymmmen aqyldassam "Óle almaı júrsiń be? Asfáltqa "zakatat ete salady" dep qorqytady...
⠀
Men oılaımyn "Nege meni asfáltqa "zakatat" etýi kerek?" Men qandaı elde ómir súrip jatyrmyn? Urpaǵym qandaı elde ómir súredi sonda? "Qalǵansha jarty jańqam men seniki" degen Mirjaqyptardyń, "Tiri bolsam Qazaqqa qyzmet etpeı qoımaımyn" degen Álıhannyń sózin kúndiz-túni aıtamyn. Al, tirligim mynaý(((
⠀
Sonda men kim bolǵanym? Olardyń sózin nesine aıtyp júrmin? Osy oı talaıdan beri mazalap júr.
⠀
Men partıa qursam meni qansha adam qoldaıdy dep oılaısyzdar? Siz qoldaısyz ba?

Meniń ınsta paraqshama, ıýtýb kanalyma "Qoldaımyn" dep jaza salsańyz jáne de eger shynymen meniń partıa quryp, halyqtyń sózin sóıleıtin depýtat bolǵanymdy qalasańyz dos-tanystaryńyzǵa aıtsańyz. Olar da meniń osy postyma, ıýtýb kanalyma "Qoldaımyz" dep jaza salsa. Eger de shynymen halyq qoldasa, onda men bel sheship kirisemin.

Qurmetpen Ahmetbek Nursıla!" delingen kásipker jazbasynda.