Jerserikten túsirilgen sýretterde Ońtústik Qytaı teńiziniń soltústiginde ornalasqan strategıalyq araldardaǵy Faıer Kres rıfinde Qytaı áskerı kúshteriniń kútpegen qozǵalysy baıqalǵan. Bul týraly Qamshy tilshisi brıtanıalyq Daily Express basylymyna silteme jasap habarlaıdy.

"Djeın aqparattyq toby" dep atalatyn qorǵanys barlaý toby "bul – Qytaı Azattyq Armıasy rıfty áýe kúshteri operasıasynyń bazasy retinde qoldana bastaǵanynyń bir belgisi bolýy múmkin" dep eskertti.

Djeın aqparattyq tobynyń negizgi sarapshysy Shon O'Konnordyń aıtýynsha, onda keminde úsh baqylaý ushaǵy úshin oryn bar, al basqa ushaqtar ashyq jerge qona alady.
  
Daily Express-tyń aqparatynsha, Qytaı kórshi elderdiń narazylyǵyna qaramastan, halyqaralyq daýly sýlardaǵy jasandy rıfter qurylysyn bastap, aıaqtaýǵa bel býǵan.

Aıta keteıik, sońǵy kezderi daýly aımaqqa qatysty AQSH odaqtastary men Beıjiń arasynda shıelenis kúsheıe tústi. Vashıngton bir aıdyń ishinde eki ret soǵys kemeleri men áskerı ushaq tasýshy kemelerin aımaqqa jibergen.

Al, birneshe kún buryn AQSH ıadrolyq bombalaýshy ushaqtaryn Úndi-Tynyq muhıty aspanyna jiberdi. Vashıngtonnyń bul áreketin halyqaralyq sarapshylar "Beıjińge ashyq qyr kórsetý" dep atady.