2015-2016 oqý jylyn aıaqtaǵan túlekter men ata-analar úshin taǵatsyzdana kútken «Memlekettik bilim granttarynyń» tolyq tizimi 11 tamyz kúni jarıalanatyn bolady dep málimdedi QR Bilim jáne ǵylym mınıstrligi. Al «Qamshy» portaly óz oqyrmandaryna mundaı ıgi jańalyqty alǵashqylardyń biri bolyp usynatynyn habarlaıdy.
Aıta keteıik, bıylǵy jylǵy talapkerlerdiń arasyndaǵy úlken konkýrs «Halyqaralyq qatynastar» mamandyǵy boıynsha júrgizilgen. Atalmysh mamandyq boıynsha 1 orynǵa 32 úmitker talasqan. Densaýlyq saqtaý salasy mamandyǵy boıynsha 1 orynǵa 18 adam úmitker bolsa, qarjy salasy, ekonomıka salalaryna 15 adamnan talasqan. Sondaı-aq, bıylǵy talapkerlerdiń eń kóp tańdaǵan mamandyqtarynyń qataryna quqyqtaný, quqyq salasy da kirgen. Bul mamandyq boıynsha bir orynǵa 14 adamnan kelgen.
Esterińizde bolsa, 2015-2016 jylǵy talapkerler úshin memlekettik bilim granttaryn taǵaıyndaý jónindegi respýblıkalyq konkýrs komısıasy óz jumysyn 5 tamyz kúni bastap ketken. Al QR Bilim jáne ǵylym mınıstri Aslan Sárinjipov myrza bıylǵy jyly JOO beriletin granttar mólsherin jarıalaǵan edi.
Mınıstr myrzanyń sózderine súıensek, bıylǵy jyly talapkerlerge 32 168 bilim granty bólinedi. Bıylǵy jylǵy UBT nátıjesi joǵarǵy kórsetkishke jetkenin eskere kele mınıstrliktegiler konkýrsqa 67 377 adam qatysatynyn aıtqan. 32 myń granttyń 12,5 myńy tehnıkalyq mamandyqtarǵa tıesili bolsa, 6 myńǵa jýyǵy pedagogıkalyq mamandyqtar úlesine tıesili. Al 3 myńǵa jýyq bilim granty aýylsharýashylyq mamandyqtarǵa tabystalatyn bolady.
Al bıylǵy jylǵy bilim granttary ıegerleriniń tolyq tizimin «Qamshy» portaly óz oqyrmandaryna 11 tamyz kúni usynatyn bolady.
Nurzat Toǵjan
«Qamshy» silteıdi
