Aqtóbede meıramhana qyzmetkerler men asabalar, fotograftar bılikten toıhanalardyń ashylýyn surap, narazylyq aksıasyna shyqty. Bul týraly Qamshy.kz aqparat agenttigi Informbúro deregin negizge alyp habarlaıdy.

Azamattar oblys ákimdiginiń aldyna baryp, toıhanalardyń ashylýyn talap etken. "Karantınde jatyp, tabyssyz qaldyq" degen olar "bılik eń bolmasa aldaǵy úsh aılyq maýsymda 150 adamǵa deıingi toılardy jasaýǵa múmkindik bersin" deıdi.

– Óner adamdarynyń barlyq tabys kózi toı bıznesi. Qazirgi ýaqytta úlken saýda oryndarynda myńdaǵan adam bar. Nelikten 200-300 adamdyq meıramhanalardy ashýǵa ruqsat bermeıdi. Toı salasyndaǵy meıramhanalardyń tolyq ashylýyn, jumys jasaýyn barlyq óner adamdary talap etip, kelip turmyz, – deıdi Nurlan Qaraǵozın atty asaba.

Sonymen qatar, narazylyq aksıasyna shyqqan Kámshat Amanǵalıeva qanshama adamnyń jumyssyz qalǵanyn aıtyp, nesıelerin tóleý qıyn bolyp jatqanyn jasyrmady . 

Jınalǵandardyń syrtynan polısıa qyzmetkerleri baqylap turdy. Ákimdik adamdary eldegi koronavırýstyń órship turǵanyn eskertip, halyqty sabyrǵa shaqyrdy.

Tazalyq mamandarynyń aıtýynsha jınalǵan halyqtyń talabyn oryndaý múmkin emes. Óıtkeni qazirgi ýaqytta oblysta koronavırýstyń tirkelý paıyzy áli de azaımaı tur. 

– 5 paıyzdan tómen bolsa, sol kezde 30 orynǵa deıingi kafelerge ashylýǵa ruqsat beriledi. Al bizde 5 paıyzdyq kórsetkish joq. Oblysta qazirgi ýaqytta 7,8 paıyz, Biz oǵan qaramaı 50 orynǵa deıin ruqsat berip otyrmyz, – dedi Aqtóbe oblysy qyzmetterdiń sapasyn baqylaý departamentiniń basshysy Nursulý Berkimbaeva. 

Endi aqtóbelik asabalar men meıramhana qyzmetkerleri úkimetten kómek surap, talaptaryn Nur-Sultanǵa joldamaqshy.