Almaty qalasynyń Naýryzbaı aýdanynda turǵyndarǵa arnalǵan demalys oryndary kóp bolady. Bul týraly Almaty qalasy ákiminiń orynbasary Muhıt Ázirbaev Naýryzbaı aýdanyndaǵy «Jumyspen qamtýdyń jol kartasy» memlekettik baǵdarlamasy boıynsha boı kóteretin nysandardy aralaý barysynda málimdedi.

Muhıt Ázirbaev birinshi kezekte «Qarǵaly» yqshamaýdanyndaǵy ózen arnasyn qarap shyqty. Onda turǵyn úılerdi sý baspaýy úshin kanaldardy qalpyna keltirý, sondaı-aq, jaıaý júrginshiler trotýarlaryn ornatý, balalar men sport alańdaryn salý jáne eskilerin jańalaý, syrtqy jaryqtandyrý jelilerin júrgizý, kógaldandyrý jumystary júrgizilýde.

– Bul aýdannyń qalaǵa qosylǵanyna kóp bola qoıǵan joq. Munda jeke turǵyn úı qurylysy nysandary kóp, al balalar men sport alańdary, turǵyndardyń demalatyn oryndary tym az. Aýdan halyqtyń ıgiligi úshin osyndaı oryndardy turǵyzý maqsatynda jaqsy daıyndaldy, Eger biz oıymyzdaǵyny túgel sátti júzege asyratyn bolsaq, onda munda turǵyndardyń serýendeýine, jaıly ómir súrýine, ýaqytyn tıimdi ótkizýine arnalǵan demalys oryndary kóp bolady. Al qazir biz bolashaqta osy jumystardy qolǵa alatyn merdigerlerdiń osy aýdannyń qaı jerine qandaı demalys oryndaryn salý kerektigin naqtylap, taǵy bir pysyqtap jatyrmyz, – dedi Muhıt Ázirbaev.

Sondaı-aq, M. Ázirbaev sapar barysynda Naýryzbaı aýdanynyń ákimshilik kesheni aýmaǵyndaǵy jóndelip jatqan skverdiń, «Qalqaman» shaǵynaýdanyndaǵy jaıaý júrginshilerdiń serýendeýine arnalǵan aımaqtyń jumystarymen tanysty.