SHQO ákimi Danıal Ahmetov 5 shildeden bastap oblystaǵy eki iri qalanyń karantınge jabylatynyn málimdedi. Bul týraly ol İnstagram paraqshasynda jazdy.

Ákimniń aıtýynsha, oblys kez kelgen jaǵdaıǵa daıyn. 1700 ınfeksıalyq, 2500 provızorlyq jáne karantındik oryndar, qarqyndy terapıa palatasy daıyndaldy. Oǵan qosa aımaqta adamdar jedel medısınalyq kómek ala almaıtyn eldimeken joq. Medısınalyq mekemeler men atqarýshy bıliktiń ózara áreket etý algorıtmderi jasalyp, bekitilgen.

– Jaǵymsyz jaıt bolmas úshin biz 5 shildeden bastap Óskemen jáne Semeı qalalaryn jabamyz, adamdar men kólikterdiń qala men aýdan arasynda júrip-turýyn shekteımiz. Osynyń barlyǵy – koronavırýs ınfeksıasy taralmas úshin jasalyp otyrǵan sharalar. SOVID-19 kúreste ózin-ózi oqshaýlaý tásili tıimdi ekeni dáleldendi. Karantın kezinde oblysta jalpy vırýs juqtyrǵandar sany 135 bolatyn. Maýsym ishinde bul kórsetkish 710-ǵa deıin artyp, áli de ósip jatyr, – dedi D.Ahmetov.

Osylaısha ol osy jeksenbiden bastap qozǵalysty shekteý mańyzdy ekenin atap aıtty.

– Biz baılanysqan adamdar tizimin úzýimiz kerek. Bul óte qajet! Osy jaǵdaıǵa neǵurlym jaýapkershilikpen qarasaq, soǵurlym qalypty ómirge tezirek oralamyz. Mekemeler, azyq-túlik dúkenderi, dárihanalar, bankter, HQO (qysqarǵan kestemen) jumysyn jalǵastyrady. Biz engizilgen karantın sharalary kásipkerlerge zıanyn tıgizbes úshin tyrysyp jatyrmyz. Taǵy da shekteýlerge túsinistikpen qaraýlaryńyzdy suraımyz. Eýropa elderinde adamdar áýelde shekteý sharalaryna moıynsunbaǵanda qandaı jaǵdaı bolǵany bárimizdiń esimizde, – dep atap ótti ákim.

Onyń aıtýynsha, adamdar óz qaýipsizdigi úshin kem degende áleýmettik qashyqtyqty saqtap, ózin-ózi oqshaýlap, maska taǵyp júrýi kerek.

– Biz de aımaqtaǵy aýrýhanalardy qajetti tehnıkamen jáne dári-dármekpen, al dárigerlerdi qorǵanys quraldarymen qamtamasyz etý úshin barymyzdy saldyq. Qazirgi bizdiń ortaq mindetimiz – shekteý sharalaryn saqtap, vırýstyń taralýyna jol bermeý, – dep sózin túıindedi oblys ákimi. ⠀