Búgin túngi 00:00-den bastap elde koronavırýs ınfeksıasynyń taralýyna jol bermeý maqsatynda birqatar shekteý sharalary kúshine endi.

Buǵan deıin Prezıdent Qasym-Jomart Toqaev Úkimet 5 shildeden bastap 14 kúnge karantın jarıalaý týraly (ol uzartylýy da múmkin) josparyn usynǵanyn málimdegen bolatyn.

Keıin premer-mınıstr Asqar Mamınniń tóraǵalyǵymen ótken Memlekettik komısıa otyrysynda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologıalyq ahýaldy turaqtandyrý sharalary qaraldy. Osy keńeste memkomıssıa 5 shildeden bastap 14 kúnge qatań shekteý sharalaryn engizý jóninde sheshim qabyldady.

Osyǵan sáıkes QR Bas memlekettik sanıtarıa dárigeri A. Esmaǵambetova 5 shildeden bastap Qazaqstan aýmaǵynda qatań karantın sharalaryn engizý týraly qaýly jarıalaǵan bolatyn.

QR Premer-Mınıstriniń orynbasary Eraly Toǵjanov karantın rejımin buzǵandarǵa aıyppul salynatynyn da eskertti. Onyń ishinde jeke tulǵalar 30 AEK-ke (1 AEK – 2778 teńge / 30 AEK – 83 340 teńge), al kásipkerlik sýbektileri 230 AEK-ten (638 940 teńge).

Sonymen qatar ol júrip-turýǵa eshqandaı anyqtamalar kerek emes jáne qalalar men óńirler arasynda blokbeketter ornatylmaıdy dep atap ótti. Tek óńirler arasyndaǵy jolaýshylar avtobýs qatynasy ýaqytsha toqtaıdy.

Halyqqa qyzmet kórsetý ortalyqtary shekteý sharalary engizilgennen keıin de sanıtarlyq jáne dezınfeksıalyq talaptardy saqtaı otyryp, óz jumysyn jalǵastyrady.