Bul týraly bıleýshi partıa Tóraǵasynyń birinshi orynbasary Baýyrjan Baıbek Facebook jelisindegi paraqshasynda aıtty.

"Qurmetti dostar! Osynaý kúrdeli kezeńde óz jaqyndary men týystarynan aırylǵan barsha janǵa qaıǵylaryna ortaqtasyp, kóńil aıtamyn. Ókinishke qaraı, álemniń kóptegen elderimen qatar Qazaqstan da COVID-19 aýrýy jyldam taralyp otyrǵan memleketter tizimine endi.

Qalyptasqan ahýaldy eskerip, keshe Memleket basshysy Qasym-Jomart Toqaev koronavırýspen kúres sharalaryn kúsheıtý týraly málimdedi. Olardyń qatarynda laboratorıalardy jete jaraqtandyrý, tósek-oryndar men PSR-testter sanyn arttyrý sharalary qamtylǵan. Osy qıyn jaǵdaıdy paıdalanyp, paıdaǵa kenelip qalǵysy keletinderge qatysty qatań sharalar qabyldanady. Bul osyndaı kúrdeli kezeń ishinde el arasynda úreı týǵyzyp, áleýmettik alaýyzdyqty qozdyrýshylarǵa qatysty bolmaq.

Jalpy, dári-dármek, Ókpeni jasandy jeldetý apparatyn satyp alýǵa, medısına qyzmetkerlerin yntalandyrýǵa jáne basqa da shuǵyl sharalarǵa keminde 150 mlrd. teńge baǵyttalady. Endigi másele – osy sharalardyń atqarýshy organdar tarapynan ortalyqta jáne óńirlerde tıimdi iske asyrylýy.

El Prezıdenti jarıalaǵan sharalardy qoldaı otyryp, biz #BizBirgemiz respýblıkalyq aksıasy aıasynda qarqyndy jumys júrgizýdi jalǵastyramyz.

Elbasy, partıa Lıderi Nursultan Nazarbaevtyń tapsyrmasymen óńirlik fılıaldardyń jumysy muqtaj azamattarǵa ataýly kómek kórsetýge baǵdarlandy. Qoǵamdyq qabyldaýlar onlaın rejımde qyzý jumys júrgizýde.

Elbasynyń bastamasymen sońǵy 3 aıda 550 myńnan astam asa muqtaj otbasyǵa, ıaǵnı otbasylyq koefısıentin eskergende 2 mıllıondaı adamǵa ataýly qarjylyq kómek kórsetildi. Taǵy 300 myńdaı otbasy azyq-túlik sebetterimen jáne qajetti taýarlarmen qamtamasyz etildi. Sondaı-aq 100 myń otbasyǵa 5 mıllıon maska taratyldy. Osynaý aýqymdy jumysqa «Jas Otan»-nyń 5 myńnan astam volonteri atsalysty.

Memleket basshysy úndeýinde atap kórsetkendeı, qazirgi kezde qazaqstandyqtardyń halqymyzdyń basyna túsken synaqqa barynsha sabyrlyq, tózimdilik pen jaýapkershilik tanytýy mańyzdy. El Prezıdentiniń janyna toptasa otyryp, birligimizdi kórsetetin kez, osy. Tek judyryqtaı jumyla otyryp qana bul qaterdi eńseremiz.

«Nur Otan» partıasy óziniń búkil resýrsyn Memleket basshysynyń tapsyrmalaryna qoǵamdyq jáne partıalyq baqylaýdy qamtamasyz etýge jumyldyrady. BizBirgemiz" delingen Baıbek jazbasynda.