AQSH áskerı-teńiz kúshteri 2014 jyldan beri alǵash ret Ońtústik Qytaı teńizine soǵys ushaqtaryn tasymaldaýshy eki topty jiberdi. Bul týraly Qamshy tilshisi Nú-Iork Taıms basylymyna silteme jasap habarlaıdy.

Basylym Vashıngtonnyń bul áreketi Beıjiń áskerı kúshteriniń daýly aımaqta jattyǵý ótkizýine jaýap retinde bolǵanyn jazdy. 

– Erkin jáne ashyq Úndi-Tynyq muhıty aımaǵyn qoldaý úshin "USS Nimitz" jáne "USS Ronald Reygan" soǵys ushaqtaryn tasıtyn áskerı kemeler Ońtústik Qytaı teńizinde qosarly tasymaldaýshy operasıalar men jattyǵýlar ótkizdi,– dep habarlaǵan AQSH áskerı-teńiz kúshteri.

Al, Qytaıdyń Azattyq armıasy daýly Parakel araldarynda bes kúndik jattyǵý ótkizýde. Vetnam men Fılıppın jattyǵýǵa narazylyq bildirgen.

Pentagon Beıjińniń áskerı jattyǵýlary kórshi eldermen kelisim boıynsha Qytaı mindettemelerin buzǵanyn aıtyp, Beıjińdi "Ońtústik Qytaı teńizindegi jaǵdaıdy odan ári nasharlatty" dep aıyptaǵan.

Qytaı men AQSH qarýly kúshteriniń strategıalyq sýlarda ótkizgen bir ýaqyttaǵy jattyǵýlary sońǵy kezdegi birneshe operasıalardyń eń mańyzdysy bolyp esepteledi, óıtkeni bul oqıǵa "eki derjavanyń Azıa-Tynyq muhıtyna ústemdik alý úshin kúresýi" dep qaralýda.

Vetnam men Malaızıanyń balyq aýlaý jáne munaı izdeý kemelerine Qytaı áskerı kúshteri qaýip tóndirgennen keıin AQSH sáýir aıynda Ońtústik Qytaı teńizine birneshe ret soǵys kemelerin jibergen.