Dúnıejúzilik densaýlyq saqtaý uıymy (DDSU) juma kúni Qazaqstandaǵy belgisiz ókpe aýrýyn COVID-19 dep sanaıtynyn málimdedi. Bul týraly Qamshy tilshisi BBC-ge silteme jasap habarlaıdy.

DDSU tótenshe jaǵdaı baǵdarlamasynyń jetekshisi Maık Raıannyń sózinshe,  Qazaqstandaǵy COVID-19 qozǵalysynyń joǵary traektorıasy belgisiz pnevmonıanyń shyn máninde COVID-19-dyń anyqtalmaǵan jaǵdaılary ekenin bildiredi.

Buǵan deıin Qytaı elshiligi elde taraǵan belgisiz pnevmonıany "Qazaqstan vırýsy" dep atap, "Qazaqstanda koronavırýstan da qaýipti vırýs taraldy" dep málimdegen. Elshiliktiń málimdemesinen keıin keıbir qytaılyq sarapshylar pnevmonıanyń Qytaıǵa taralýyn boldyrmaý úshin sharalar qabyldaý kerek ekenin aıtyp, Qazaqstan men Qytaıdyń soltústik-batysyndaǵy Shyńjańnyń shektesetinin eskertken. Kóp ótpeı, Batys BAQ-tary "Ortalyq Azıa elinde ólim kórsetkishi koronavırýstan joǵary jańa vırýs paıda boldy" degen mazmundaǵy aqparattardy jarysa jarıalaǵan. 

Oǵan sebep, Qazaqstannyń densaýlyq saqtaý mınıstri Alekseı Soıdyń "2020 jyly pnevmonıadan 1172 adam qaıtys boldy" degen málimdemesi. Alekseı Soı keltirgen derekke saı, pnevmonıadan qaıtys bolǵandar koronavırýs óliminen bes esege kóp, sebebi resmı statısıka boıynsha qazirge deıin Qazaqstanda COVID-19-dan kóz jumǵandar sany 264.

Al 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonıadan qaıtys bolǵanyn aıtqan. Bul esep boıynsha, pnevmonıadan kóz jumǵandar COVID-19-dan qaza tapqandardan 7 ese kóp.

Osy derekterge baılanysty sheteldiń iri BAQ-tary "Qazaqstanda ólim mólsheri koronavırýstan da joǵary, qaýipti vırýs tarap jatyr" degen aqparatty jarysa taratty. Tipti, keıbir elder azamattaryna Qazaqstannan abaılaý týraly eskertýler jasaǵan.

Alaıda artynsha Londonda shyǵatyn Daily Mail basylymy brıtanıalyq jáne qytaılyq epıdemıologtardan suhbat alyp, ǵalymdardyń Qazaqstanda taralǵan pnevmonıa shyn máninde COVID-19 dep sanaıtynyn jarıalaǵan.

Beıjińdegi Qytaıdyń bas epıdemıology jáne Ulybrıtanıa Ýorvık ýnıversıtetiniń vırýsology Qazaqstanda taralyp jatqan "belgisiz pnevmonıany" epıdemıologıalyq turǵydan COVID-19 dep tujyrymdaıtynyn jetkizgen. 

Qazaqstandyq neırohırýrg dáriger Myńjylqy Berdiqojaev ta "pnevmonıadan qaıtys bolyp jatqan adamdardyń 99 paıyzynyń ólimine koronavırýs sebep" dep aıtqan.