Doǵarystaǵy general-maıor, Qazaqstan qorǵanys mınıstriniń burynǵy orynbasary Ámirbek Tógisov qaıtys boldy. Bul týraly aqyn Jumash Kenebaı óziniń facebook paraqshasynda habarlady.

"Opozısıa generaly, Qazaqstan qorǵanys mınıstriniń burynǵy orynbasary, áıgili "Úsh Júz" partıasy lıderleriniń biri, aq generaldar qolynan aıýandyqpen óltirilgen ult serkesi TÓGİSTİŃ tikeleı urpaǵy, aramyzdaǵy bir jas aıyrmashylyǵyna qaramaı qurdasym, zamandasym, asyl azamat Ámirbek Tógisovten qapyda aırylyp qaldyq!" delingen aqyn jazbasynda.

Jumash Kenebaıdyń sózinshe, hal ústinde jatqan generalǵa dári tabylmaǵan. Dári tabylyp, tańerteńgisin jetkizgeli otyrǵanda Ámirbek Tógisovtyń túnde júrip ketkeni týraly sýyt habar jetken.

Ámirbek Tógisov 1949 jyly 30 mamyrda Altaı ólkesinde týǵan. Áskerı mánsaby vzvod komandıri retinde bastalyp, Qazaqstannyń ishki áskeri komandıriniń orynbasary, qorǵanys mınıstriniń orynbasary qyzmetterine deıin kóterilgen.

Zeınetke shyqqannan keıin "Qazaqaltyn" mekemesinde qaýipsizdik qyzmeti departamentiniń dırektory, artynan basqarýshy dırektor bolǵan.

Sondaı-aq "Ádiletti Qazaqstan úshin" uıymynyń Almaty oblystyq fılıalynyń tóraǵasy, Jalpyulttyq sosıal-demokratıalyq partıa tóraǵasynyń orynbasary, parlament májilisi depýtattyǵyna úmitker bolǵan.

Jaqyndarynyń sózinshe, marqum koronavırýstan qaıtys bolǵan.