Túrkistan oblysy Kentaý qalasyna qarasty Shornaq aýylynda bolǵan jappaı tóbelesten keıin tórt adam ustalyp, olardyń ekeýi qamaýǵa alyndy. Bul týraly oblystyq polısıa departamenti habarlady.
Keshe túnde bolǵan tóbelesti áleýmettik jeli qoldanýshylary "ultaralyq qaqtyǵys" dep sıpattaǵan bolatyn, alaıda polısıa departamenti taratqan habarlamada "Shornaq aýylynda turmystyq janjal boldy" dep aıtyldy.
"Túrkistan oblysy Kentaý qalasyna qarasty Shornaq aýylynda turmystyq janjal boldy. Osy oqıǵaǵa baılanysty júrgizilgen izdestirý is-sharalary barysynda krımınaldyq polısıa qyzmetkerleri tórt azamatty ustady. Olardyń ekeýi sot sheshimimen qamaýǵa alyndy. Qazirgi ýaqytta bolǵan oqıǵanyń tolyq mán-jaıy anyqtalyp, buzaqylyq faktisi boıynsha sotqa deıingi tergeý amaldary júrgizilip jatyr" delingen polısıa departamenti taratqan habarlamada.
Departament taratqan habarlamaǵa qarǵanda oqıǵa 21 shilde kúni aýyl turǵyndary arasynda bolǵan janjaldan keıin bastalǵan. Janjal sońy 22 shilde kúni jappaı tóbeleske ulasqan. Saldaryna úsh adam tastan jaraqat alǵan. Olardyń arasynda ýchaskelik polısıa ınspektory da bar. Polısıa departamentiniń dereginshe, 23 shilde kúni Shornaq aýylynda "arandatýshylar jınalyp, jaqyn mańdaǵy aýyl turǵyndaryn zańǵa qaıshy áreket jasaýǵa" shaqyrǵan, biraq polısıa qyzmetkerleri oǵan jol bermegen.
Pikir qaldyrý