Almaty qalasynyń qylmystyq ister jónindegi mamandandyrylǵan aýdanaralyq sotynyń sýdıasy Keńshilik Ábdildınov koronavırýs ınfeksıasynan qaıtys boldy. Bul týraly qalalyq sottyń baspasóz qyzmeti habarlady.

"Almaty qalasy qylmystyq ister jónindegi mamandandyrylǵan aýdanaralyq sotynyń sýdıasy Keńshilik Ábdildınov ómirden ozdy. Almaty qalalyq soty, qylmystyq ister jónindegi mamandandyrylǵan aýdanaralyq soty, basshylyq jáne sýdıalar atynan onyń otbasyna jáne týysqandaryna kóńil aıtamyz" delingen habarlamada.

Keńshilik Ábdeldınov 1963 jyly 28 qazanda dúnıege kelgen. 1990 jyly S.M.Kırov atyndaǵy Qazaq memlekettik ýnıversıtetin bitirgen.

Ol 1992 jyly Ádilet organdarynda, 2000 jyly Qazaqstan Respýblıkasy Joǵarǵy Soty apparatynda qyzmet atqarǵan.

2003 jyly Almaty oblystyq sotynyń sýdıasy, 2013 jyldan bastap Almaty qalasynyń qylmystyq ister jónindegi mamandandyrylǵan aýdanaralyq sotynyń sýdıasy boldy.

Ol qazaqstandyq mánerlep syrǵanaýshy Denıs Tenniń ólimine qatysty isti qaraǵan.

Buǵan deıin qaýipti indetten Qazaqstan qorǵanys mınıstriniń burynǵy orynbasary – Ámirbek Tógisov, Qazaqstannyń prezıdenttigine úmitker bolǵan – Jaqsybaı Bazylbaev, Aqtóbe qalasynda ınfeksıalyq aýrýhananyń bas dárigeri – Qalıhan Qozbaǵarov, Almaty oblysy ákiminiń orynbasary – Serikjan Beskempirov, sonymen qatar Almaty oblysynyń Bas memlekettik sanıtar dárigeri – Qaırat Baımuhambet qaıtys bolǵan.