Ǵalymdar koronavırýs juqtyrǵan adamdar nege ıis sezý qabiletinen aıyrylatynyn anyqtady. Vırýs ıis sezý neırondaryn zaqymdamaıdy, sondyqtan ıis sezbeý uzaqqa sozylmaıdy, dep habarlady Gazeta.Ru.

Buryn anosmıa koronavırýstyń eń aldyńǵy jáne negizgi belgisi bolatyn. Zertteýlerdiń kóbi bul basqa sımptomdarǵa – ystyq, jótelge qaraǵanda, aýrýdyń bary týraly tez sıgnal beretinin aıtqan. Biraq bul sımptomnyń negizinde jatqan bıologıalyq mehanızmder belgisiz bolyp keldi.

Vırýs muryn qýysynyń joǵarǵy bóligindegi jasýshalardy zaqymdaıdy dep esepteldi. Sodan neırondar ıis týraly mıǵa sıgnal bermeıdi. Biraq zertteý bul boljamdy joqqa shyǵardy.

Ǵalymdar muryn qýysynyń joǵarǵy bóligindegi SARS-CoV-2 vırýsyna tózimdigiligi tómen ıis sezý jasýshalaryn anyqtady. Sóıtse, mıǵa sıgnal beretin jasýshalar olardyń arasynda bul neırondar bolmaı shyqty.

– Biz naýqastardyń koronavırýs juqtyryp, ıis sezý qabiletiniń joǵalýy ınfeksıa juqtyrǵan neırondarmen baılanysty emes ekenin taptyq, – dep túsindirdi zertteý avtory Sandıp Robert Datta.

Bul sol fýnksıaǵa qosalqy jasýshalardyń áserinen bolady.

– Jaqsy jańalyq dep oılaımyn. Sebebi ınfeksıa joıylǵannan keıin ıis sezý neırondary qaıta qalpyna kelýi kerek. Biraq bizge bul qorytyndyny rastaý úshin munyń negizinde jatqan mehanızmderdi túsinetindeı kóbirek derek qajet, – dedi Datta.

Dám jáne ıis sezbeý – COVID-19 vırýsynyń eń keń taraǵan sımptomy. Statısıka koronavırýs juqtyrmaǵandarǵa qaraǵanda, juqtyrǵan naýqastar osy sezimderdi 27 ese jıi joǵaltatynyn kórsetti. Sondaı-aq ıis jáne dám sezý birneshe aptadan keıin ǵana qalpyna keletini aıtylǵan.