Berel qorymy Shyǵys Qazaqstan oblysy Katonqaraǵaı aýdany Buqtyrma ózeniniń on jaǵalaýynda ornalasqan. 

Myńjyldyqtar tarıhyn arqalaǵan Berel qorymy – Qazaqstannyń jalpyulttyq kıeli oryndary qataryna engen qasıetti meken. Qundy jádigerler men obalar tarıh qoınaýynan syr shertip, arheologıalar zertteýlerdiń aınymas ortalyǵyna aınaldy.

Obalardy júıeli túrde zertteý Zeınolla Samashevtyń esimimen tikeleı baılanysty. Onyń basshylyǵymen júrgizilgen qazba jumystardyń nátıjesinde 1998-1999 jyldary qoldan jasalǵan máńgi muzdyqtaǵy № 11 «Patsha qorǵanynan» saq kósemi men áıeldiń jáne er toqymymen birge jerlengen 13 jylqynyń múrdesi tabyldy, oǵan qosa patshanyń saltanat kıimi, minis attardyń at ábzelderi, aǵashtan, bylǵarydan, kıizden ań stılinde jasalǵan myńnan astam qolóner jádigerleri tabyldy. Keıinirek taǵy da máńgi toń basqan eki qorǵan zerttelip, olardan da jerlengen jylqylardyń múrdeleri tabyldy.

2016 jyly oblys ákimi Danıal Ahmetov­tiń bastamasymen arheologıa sala­synda ǵylymı-zert­teý jumystaryn damytý baǵdarlamasy qabyl­danǵan bolatyn. Baǵdarlamanyń negizgi maqsaty - óńir­diń týrısik baǵytyn damytý úshin mádenı brendin qa­lyp­tas­tyrý, Álemdik IýNESKO qoryn tolyqtyrý.

Aımaq basshysy Danıal Ahmetovtiń tikeleı tapsyrmasymen qundy jádigerlerdi kelýshilerdiń kórýine múmkindik jasaý úshin qorǵannyń ústinen shyny sarkofag turǵyzyldy.  Qatty shynydan jasalǵan sarkofagtiń aýmaǵy 90 sharshy metr, al bıiktigi jádigerler jatqan jerden bastap 8,5 metrdi quraıdy. Ashyq aspan astyndaǵy murajaıdy ashý – oblys úshin mańyzdy mádenı qubylys boldy.