Semeılik bes jasar búldirshin Bota Talǵat Abaı Qunanbaıulynyń óleńderin jatqa aıtyp, ánderin naqyshyna keltirip oryndaıdy.

Jas talant "Bolashaqqa baǵyt", "Ásempaz bolma árnege", "Ónerge qanat qaqqandar" sıaqty respýblıkalyq baıqaýlarda mánerlep oqýdan top jaryp, jeńimpaz atandy. Sóıtip, kórermenderdiń qoshemetine bólendi.

Botanyń anasy Meıirimniń aıtýynsha,  qyzy úsh jastan bastap óleńderdi jatqa aıtady jáne onyń kórkem ádebıetke degen qyzyǵýshylyǵy joǵary.

– Balam, alǵash ret Abaı eskertkishin kórgende uly aqynnyń kim bolǵanyn, halyqtyń qurmetine nelikten erekshe bólengeni týraly surap, qyzyǵýshylyq tanytty. "Ol kisi de men sıaqty óleńderdi jatqa aıtty ma?" dep ózimen birge uqsastyq izdedi. Búginde aqynnyń jıyrmadan astam óleńin mánerlep oqyp, ánderin oryndaıdy. Kúnde bir óleńin jattap alady, - dedi Meıirim.

Jas talanttyń alǵa qoıǵan maqsattary jeterlik. Ol bolashaqta ánshilikke bet burǵysy keledi. Sonymen qatar dáriger bolýdy da armandaıdy.