Vashıngton, Beıjiń jáne Taıbeı arasyndaǵy áskerı shıelenister áli de jalǵasyp, Amerıka Qurama Shtattary seısenbide Taıvan buǵazyna áskerı kemesin jiberdi. Bul týraly South China Morning Post habarlady.

AQSH-tyń Tynyq muhıt flotynyń habarlaýynsha, amerıkalyq zymyran joıǵysh "USS Mustin" Taıvan men Qytaı materıgi shekarasyndaǵy sý jolymen júrip ótken.

"Amerıkanyń 7-shi floty (shtab-páteri Japonıada ornalasqan) Úndi-Tynyq muhıty aımaǵynda AQSH-tyń ulttyq múddelerin qoldaý maqsatynda áskerı-teńiz operasıalaryn júrgizedi" delingen sársenbi kúni tańerteń jasalǵan málimdemede.

AQSH Áskerı-teńiz kúshteriniń eń úlkeni esepteletin 7-shi flot teńizge shyǵatyn 35 memleketpen teńiz qaýipsizdigin nyǵaıtýǵa, turaqtylyqty qamtamasyz etýge jáne qaqtyǵystardy boldyrmaýǵa baǵyttalǵan seriktestik qarym-qatynas ornatyp jatqany habarlanǵan.

"AQSH bıligi halyqaralyq zań ruqsat etken jerde ushý, júzý jáne jumys isteýdi jalǵastyrady" delingen Vashıngtonnyń málimdemesinde.

Basylymnyń jazýynsha, áskerı operasıany Beıjiń zymyran joıǵyshtarymen baqylasa, Taıvan fregattaryn jibergen.

Aıta keteıik, AQSH sońǵy alty aıda Ońtústik Qytaı teńizinde belsendi áreket etýde.