Búgingi kúni KVI-den saýyǵyp shyqqan adamdardyń plazmasyn naýqastarǵa quıý arqyly oǵan antıdene "berip", ımýndyq júıeni nyǵaıtýǵa bolady. Bul zerthanalyq jáne klınıkalyq turǵydan dáleldengenin atap ótken oryndy. COVID-19 ınfeksıasymen aýyrǵan adamdardyń ımýndyq plazmasy bul aýrýmen kúresýge kómektesedi.
Qannyń quramynda antıdenesi bar bir adam, kem degende jaǵdaıy aýyr eki naýqastyń ómirin saqtap qala alady. Apparatyq plazmaferezdi tapsyrý qaýipsiz. Sondaı-aq eshqandaı aýyrsynýdy sezinbeısiz.
KVI-diń ortasha jáne aýyr túrimen aýyryp, odan saýyǵyp shyqqan kez kelgen kámelettik jasqa tolǵan adam donor bola alady. Eń bastysy, aýrýdan aıyqqanyna kem degende eki apta ótse bolǵany. Plazma tapsyryp, dárigerlerge kómek kórsetý úshin jergilikti mekenjaı boıynsha ODA-ǵa baryp, antıdenege test tapsyrý kerek. Budan soń oblystyq qan ortalyǵyna baryp, emhanalyq-bıohımıalyq kórsetkish pen qan tobyńyzdy anyqtap, AITV, sıfılıs, brýsýllóz ben gepatıtke qan tapsyrý kerek. Eger saraptama qortyndysy oń bolsa, plazmaǵa tapsyrýǵa jiberedi. Atalmysh prosedýra úshin 7 AEK nemese 19446 teńge tólenedi.
Koronavırýspen aýyrǵan naýqastarǵa qol ushyn bergisi keletin jandar oblystyq qan ortalyǵyna myna kórsetilgen telefon nómirler boıynsha habarlasa alady: 8(7232)70 38 38 nemese 87057520964.
Pikir qaldyrý