Qazaqstanda 17 tamyzdan bastap Nur Otan partıasynyń praımerızine kandıdattardy tirkeý bastaldy. Úsh kúnniń ishinde Shyǵys Qazaqstan oblysynda 309 adam tirkelip úlgerdi. Onyń ishinde 43% áıelder, 26% jastar quraıdy. Bul týraly aımaqtyq komýnıkasıalar qyzmetinde ótken brıfıń barysynda Nur Otan partıasynyń SHQO boıynsha fılıaly tóraǵasynyń birinshi orynbasary Oleg Chýgýnkov málim etti.
«309 adam tirkeldi. Onyń ishinde 206-sy ózin-ózi usynýshylar. Bizdi partıalastardyń belsendiligi qýantty. Basty maqsat - múmkindiginshe kóp adamdardy tartý bolatyn. Bizge 1200-den astam qońyraý kelip tústi. Áli de telefon shalatyndar qatary jalǵasýda. Menińshe, kandıdattardyń sany budan da kóp bolady», - dedi Oleg Chýgýnkov.
Kandıdattardy tirkeý 28 tamyzǵa deıin jalǵasady. Keıin kandıdattar úgit-nasıhat jumystaryn júrgizip, debat uıymdastyryp, daýys jınaıdy.
Jalpy, qazirgi ýaqytta ashyq jáne shynaıy ishki partıalyq saılaýdy ótkizýge barlyq jaǵdaı jasalǵan. Partıa kóshbasshysy Nursultan Nazarbaev aıtqandaı, eń bastysy, básekege qabiletti barlyq qatysýshy arasyndaǵy teń quqyqty saqtaý.
«Praımerızge partıa múshelerinen bólek, elimizdiń damýyna úles qosqysy keletin árbir belsendi azamat qatysa alady. Praımerız aktýaldy máselelerdi qozǵap, ony sheshýge baǵyttalyp otyr. Sondyqtan biz shynaıy kóshbasshylardy kórgimiz keledi», - dedi Oleg Chýgýnkov.
Praımerızge qatysý erejeleri týraly tolyq aqparatty nurotan.kz jáne primaries.kz saıttarynan kórýge bolady.
Pikir qaldyrý