SHQO-da joǵalyp ketken 7 jasar balanyń máıiti aýyl mańynan tabyldy. Bul týraly oblystyń polısıa departamenti habarlady.

Polısıa men eriktiler Altaı aýdany Zýbovsk aýylynda 7 jasar Edýardty bir táýlikten astam izdedi. Ata-anasynyń aıtýynsha, balasy 29 tamyzda ádettegideı aýlaǵa oınaýǵa, velosıped tebýge shyqqan. Sodan biraz ýaqyttan keıin joǵalyp ketkenin bilgen. Keıinnen týystary balany ózderi izdep, taba almaı, 30 tamyzda polısıanyń kómegine júgingen.

"30-shy tamyzda izdestirý jumystary toqtatylǵan. Balanyń denesi Zýbovsk aýylynyń janynan tabylǵan. Denesinde zorlyq-zombylyq belgileri bar ekeni belgili boldy. Qazir jaǵdaıdy polısıa ókilderi anyqtap jatyr" delingen departament habarlamasynda.

Tártip saqshylary kúdikti retinde Zýbovsk aýylynyń 20 jastaǵy turǵynyn ustady. Qazirgi ýaqytta qylmystyq kodekstiń "adam óltirý" baby boıynsha sotqa deıingi tergeýdi bastady.

– Tergeý barysynda kúdikti kinásin moıyndap, Altaı aýdanynyń polısıa bólimshesiniń ýaqytsha ustaý ızolátoryna qamaldy, – deıdi SHQO polısıa departamentiniń bastyǵy Saǵat Mádıev.