Búgin, 13 qyrkúıek "Demokratıalyq partıa" qurý boıynsha bastamashyl top jetekshisi, qoǵam belsendisi Janbolat Mamaı jáne onyń jaqtastary Almaty qalasy Shevchenko men Ýálıhanov kóshesiniń qıylysynda ornalasqan Shoqan Ýálıhanov alańynda eskertilgen mıtıń ótkizdi. Alańda bolǵan "Qamshy" tilshisi mıtıńten arnaıy fotoreportaj daıyndady. 

Mıtıńke 200-ge jýyq belsendi qatysyp, "Halyqqa bir rettik nesıelik amnıstıa jarıalaý", "Jer sheteldikterge jalǵa berilmeýge tıis!", "Bankterge emes, mıllıondaǵan halyqqa qoldaý kórsetilsin!", "Maks Bokaevqa bostandyq" degen talaptaryn aıtty. 

Qoǵam belsendisi Janbolat Mamaı bılik halyqtyń tilegen oryndamaıynsha, mıtıńter jalǵasa beretinin jetkizdi.

– Biz mıtıńti resmı túrde eskertý formatynda ótkizip jatyrmyz. Eshkimdi ustamaı, qýdalamasa adam kóbirek shyǵyp, ózderiniń talaptaryn qoısyn dedik. Biz búgingi mıtıńke barynsha daıyndaldyq, halyqty shaqyrdyq. Árbir ótken mıtıńtiń nátıjesi bolady. Kóbisi mıtıńten qorqyp qalǵan, mıtıńti estise tóbe shashtary tik turady. Mıtıń eskertilgen formatta, zańnyń sheńberinde ótti, – deıdi Mamaı.