Qoǵam belsendisi, Demokratıalyq partıa qurý boıynsha yntaly top jetekshisi Janbolat Mamaı men onyń jaqtastary 4 tamyzda bir rettik nesıe amnıstıasyn jarıalaý bastamasyn qoldaǵan 100 myńǵa tarta adamnyń qolyn prezıdent ákimshiliginiń kanselárıasyna ótkizgen. Belsendilerdiń bastamasyna búgin, 15 qyrkúıekte qarjy naryǵyn retteý jáne damytý agenttiginen jaýap keldi.
Joldanǵan hatta kredıtteý kóleminiń shamadan tys ósip ketpeýi úshin agenttik tarapynan jasalǵan, jasalyp jatqan sharalar tizimi usynylyp, syrǵytpa jaýap berilgen.
Hat mátininiń sońynda bankterden qaryz alýshylardyń bereshegin qaıta qurylymdaýǵa, borysh júktemesin azaıtýǵa baǵyttalǵan sharalardy júrgizý talap etiledi deline kele, boryshkerlerdiń kredıt boıynsha mindettemesin oryndatqyzatyn, ıaǵnı kredıtti tóletetin sharalar da talap etiledi dep kórsetilgen.
Belsendi Mamaı facebook paraqshasyna "aryz tapsyrǵan 100 myńǵa tarta adamnyń máselesi jeke qaralady delingen (hatta - red). Biraq búkil elde talap oryndalý úshin myńdaǵan adam qatysqan beıbit mıtıń kerek ekeni sózsiz" degen jazba qaldyrdy.
Artynsha áleýmettik jelide tikeleı efırge shyǵyp, "bılik 13 qyrkúıektegi mıtıńke az adam jınalǵandyqtan osyndaı syrǵytpa jaýap berdi" degendi aıtyp, nesıe amnıstıasyn jarıalatý úshin talapty kóptep qoıý qajettigine nazar aýdardy. Sóz sońynda talap oryndalýy úshin Dempartıamen birge jumysty ary qaraı jalǵastyrýǵa shaqyrdy.
Pikir qaldyrý