Senat tóraǵasy Máýlen Áshimbaevtyń tóraǵalyq etýimen Senat Búrosynyń otyrysy ótti. Senatorlar respýblıkalyq búdjetti zerdelep, pysyqtaıtyn bolady. Bul týraly parlament senatynyń resmı saıtynda habarlandy.

Senat búrosynyń otyrysynda aldaǵy jalpy otyrystyń kún tártibi talqylandy. Atap aıtqanda Máýlen Áshimbaev Parlamentke 1 qyrkúıekte kelip túsken úsh jylǵa arnalǵan respýblıkalyq búdjet jobasyna depýtattardyń nazaryn aýdardy. Senat tóraǵasy eldiń basty qarjy qujatymen jumystyń naqty merzimin belgiledi.

– Biz osy zańdy 1 jeltoqsanǵa deıin qabyldaýymyz kerek. Ony ózderińiz jaqsy bilesizder. Sondyqtan senat depýtattary májilistegi áriptesterimen birge atalǵan zań jobasy boıynsha jumysty bastady. Respýblıkalyq búdjet jónindegi zań jobasyn ýaqytyly ári sapaly qabyldaý parlament pen úkimettiń tıimdi ózara is-qımylyna baılanysty, – dedi Máýlen Áshimbaev.

Senat tóraǵasy jurtshylyq memlekettik qarjyny bólý máselelerine erekshe nazar aýdaratynyn, qoǵamda respýblıkalyq búdjetti josparlaýǵa qoıylatyn talaptar arta túskenin eske saldy.

Máýlen Áshimbaev ony oń úrdis retinde sanaıdy. Sondyqtan parlamentshiler zań jobasyn muqıat zerdelep, qoǵam tarapynan bar suranystardy eskere otyryp pysyqtaýy qajet.