Saǵat túngi on ekige jaqyndaǵanda meıramhanadan uzatylǵan qyzdy alyp shyǵýǵa qudalar yńǵaılana bastaǵan edi. Shoý qylyp, ándetip, zapıske jazylǵan jattandy sózderin qaıtalap qazaqsha kıingen qyzdar júrdi.

-Aıalap, betinen qaqpaı ósirgen ákesine qurmetimizdi bildirip, shapalaq soǵaıyq, aǵaıyn!-degen kúnde toıda aıtatyn sózin qyzdar qaıtalaǵan sátte Onyń kózinen jas ytqyp ketti. Mólt-mólt...

Onyń ákesi joq edi.

Ákesiniń ólgenine ǵana emes, sheshesiniń jalǵyzdan-jalǵyz óıtip-búıtip, qatarynan qaldyrmaı baǵyp-qaqqany esine oraldy. Anasynyń kóbine kóńil kúıi bolmaıtyn.  Razy emes, júzi solǵyn tartyp turatyn. Nege ekeni, toı-tomalaqqa bara qalsa, qatty boıanyp alatyn... Sheshesiniń ózin jurttan kem sezinetini dál sol mezette onyń esine tústi. Anasymen anda-sanda pikirleri sáıkes kelmeı de qalatyn... Qatyp qalǵan kóńilin uryspen syrtqa shyǵaryp, aqyry ekeýi kózderiniń jasyn syǵyp alatyn edi. Biraq sóıtip júrip-aq, sheshesi nesıe alsa da, dúrildetip toıyn jasap berip jatqany onyń kóńilin bosatyp, jastyń ústinen jas yrshytty... Osy bir aqparattyń bári birigip onyń janyn qınap, keýdesin qysyp turǵan bolatyn.

Sol bir kóńilsiz álemnen kúıeý jigit ony kóterip alyp ketip bara jatqanda, janary jasaýrap qana turǵan anasynyń búgin úıde jalǵyz ózi qalatynyn oılap, qyz ketip bara jatty.

Álisher  Rahat