Qostanaı oblysynyń qylmystyq ister jónindegi mamandandyrylǵan aýdanaralyq soty Rýdnyı qalasynyń turǵynyna úkim shyǵardy. Sergeı Pahtýsovqa eki áıeldi óltirip, denelerin bólshektegen degen aıyp taǵyldy, dep habarlady Nasha Gazeta.

Er adam kináli dep tanylyp,  ómir boıyna bas bostandyǵynan aıyryldy. Ol jazasyn tótenshe qaýipsizdik kolonıasynda óteıdi.

– Sottalýshy úılengen, onyń jas balasy bar, biraq ol sol ýaqytta Rýdnyıdyń jas turǵynymen kezdesip júrgen. Aradaǵy baılanysty jasyrý maqsatynda sottalýshy qyzdy jaldamaly páterinde óltirgen. Ol qyzdyń moınyna pyshaq tyqqan. Qaıtys bolǵan qyz ájesine turǵan jeri týraly habarlama jibergenin kórgende, ol ájesiniń páterine bet alǵan. Onda ol qyzdyń ájesin moınyna pyshaq tyǵyp óltirdi. Keıinirek máıitterdi bólshektep, sómkelerge salyp, óziniń balkonyna jasyryp qoıǵan. Keıinnen máıit qaldyqtaryn Tobyl ózenine batyryp jibergisi kelgen, – dedi sot Jannar Tileýbaeva.

Sottyń aıtýynsha, kisi ólimi aldyn-ala josparlanyp, "erekshe sınızm jáne salqynqandylyqpen" jasalǵan. Aıypker buryn qasaqana kisi óltirip sottalǵandyqtan, osy joly ony ómir boıyna bas bostandyǵynan aıyrý jazasy taǵaıyndalǵan. Sottalýshy óz kinásin moıyndaǵan, sonymen qatar iske qatysty dálelder tabylǵan. 

Úkim áli zańdy kúshine engen joq jáne shyǵarylǵan kúnnen bastap 15 kún ishinde shaǵym jasalýy múmkin.

Kisi óltirý aqpan aıynyń sońynda boldy. Rýdnyıda óz páterinen 68 jastaǵy arbada otyratyn múgedek áıel joǵalyp ketken. İzdeý barysynda ájesimen birge turǵan 34 jastaǵy Regına da joǵalyp ketkeni belgili boldy.

Polısıanyń málimetinshe, kúdikti tez arada ustalǵan. Jaldamaly páterde turatyn azamattyń balkonynan eki adamnyń denesi tabylǵan. Er adam Tobyl ózeniniń muzyn oıyp máıit qaldyqtaryn tastamaq bolǵan, biraq ol aıǵaqtardy jasyryp úlgermegen.