«Nur Otan» partıasynyń praımerızin ótkizý qaǵıdalaryna sáıkes, daýys berý kúni ortalyq uıymdastyrý komıteti bekitetin respýblıkalyq Kúntizbelik josparda aıqyndalady. Daýys berýdiń belgilengen merzimi –2020 jylǵy 3 qazankúngi saǵat 14.00-ge deıin.

2 qazan saǵat 17.00-degi jaǵdaı boıynsha praımerızde 446 297 saılaýshy nemese júıede tirkelgen partıa músheleriniń 57%-ti daýys berdi.

Partıalyqtar men jalpy jurtshylyqtyń partıaishilik saılaýǵa joǵary qyzyǵýshylyǵy bir mezgildegi saıtqa júginý sanyn edáýir arttyrdy (100 myń jáne odan da kóp), sonyń saldarynan daýys berýdiń alǵashqy saǵattarynda saıtqa qoljetimdilik pen tirkelý boıynsha ýaqytsha qıyndyqtar týyndaı bastady.

Aqparattyq júıege túsken tehnıkalyq júktemelerdiń saldarynan partıanyń kóptegen músheleri daýys bere almady. Qoǵamdyq qabyldaýdyń koll-ortalyqtaryna 1,5 myńnan astam qońyraý kelip túsken. Onyń ishinde 828-i daýys berý kezindegi tehnıkalyq qıyndyqtar máseleleri boıynsha.

Sondaı-aq, áleýmettik jeliler arqyly partıanyń uıymdastyrý komıtetterine partıalyqtar men kandıdattar tarapynan daýys berý merzimin uzartý týraly ótinishteri kelip tústi. Ótinishterde daýys berý jumys kúnderi ótip jatqandyqtan tańdaý jasaýǵa ýaqyttyń jetispeýi atap ótilýde.

Sonymen qatar, erteń, 3 qazanda, saǵat 08.00-den 14.00-ge deıin saılaý ýchaskeleri jumys isteıdi. Óz kandıdatyna daýys bere almaǵan azamattar jappaı ýchaskelerge kelýqaýpi bar. Pandemıa jaǵdaıynda bul koronavırýs ınfeksıasyn juqtyrýǵa ákelýi múmkin.

Joǵaryda baıandalǵandy eskere otyryp, Ortalyq uıymdastyrý komıtetiniń hattamalyq sheshimimen Respýblıkalyq kúntizbelik josparǵa ózgerister engizildi. Osylaısha, veb-saıt jáne mobıldi qosymsha arqyly onlaın daýys berý merzimin týra bir táýlikke, 2020 jylǵy 4 qazan kúngi saǵat 14.00-ge deıin uzartý týraly sheshim qabyldandy.

Bul rette, úgit-nasıhat jumystary senbi, ıaǵnı 3 qazan kúngi 14.00-de saılaý ýchaskeleriniń jabylýymen bir mezgilde aıaqtalatynyn atap ótý qajet.