Qamshy.kz saıtynda armenıalyq delingen Armenianreport.som basylymynda jarıalanǵan "Qazaqstannyń ekijúzdiligi: bir odaq, biraq ázerbaıjandar qymbattyraq" atty maqala týraly aqparat shyqqan. Armenıanyń Qazaqstandaǵy elshiligi Qamshy.kz portalyna habarlasyp, maqaladaǵy oılar Armenıanyń resmı ustanymyna esh qatysy joq, aqparat resýrsy feık ekenin málimdep, aqparatty óshirýdi surady.
Elshiliktiń Qamshy.kz portalyna joldaǵan hatynda Armenianreport.com saıty "feık" delinip, saıttaǵy aqparat burmalanyp berilgeni, tap-taza dezınformasıa ekeni jazylǵan. Elshiliktiń dereginshe, maqala avtory retinde kórsetilgen Tevos Arshakán esimdi analıtık ómirde joq adam.
Armenıanyń Qazaqstandaǵy elshiliginiń facebook paraqshasynda jarıalanǵan málimdemede atalǵan saıt Ázerbaıjanda jasalǵany habarlanǵan.
Málimdemede Ázerbaıjan Qazaqstan aýmaǵynda armándarǵa qarsy kóńil-kúı qalyptastyrý úshin feık-saıtty qoldaný arqyly kezekti ret arzan propagandaǵa baryp otyrǵany, Tevos Arshakán esimimen buǵan deıin de arandatý sarynynda kóptegen materıaldar shyqqany jazylǵan.
Qamshy.kz portaly Armenıanyń Qazaqstandaǵy elshiliginiń suraýy boıynsha Armenianreport.som saıtynda jaryq kórgen maqala týraly aqparatty óshirdi.
Eskerte keteıik, daýly maqalada avtor Qazaqstandy Armenıamen ujymdyq kelisim-shart uıymyna múshelik etetinine qaramastan, Taýly Karabah konflıktinde Ázerbaıjandy jaqtap otyr dep aıyptaǵan.
Sondaı-aq Qazaqstannyń Ázerbaıjandaǵy tótenshe jáne ókiletti elshisi Serjan Ábdikárimovtyń Ázerbaıjanǵa saparyn "Ázerbaıjan prezıdenti Ilham Álıevtiń aram oınyna aralasý" dep baǵalap, "ázerbaıjandardyń bergen alkogoli men "altynnan aptaımyz" degen ýádesinen keıin, elshiniń tili aýzyna syımaı aldyn ala daıyndap qoıylǵan jýrnalıserge suhbat bere bastady" dep málimdep Qazaqstan elshisiniń, sol arqyly Qazaqstan Respýblıkasynyń abyroı-bedeline nuqsan keletin daýly málimdemeler aıtqan.
Sonymen qatar maqalada Qazaqstan Ázerbaıjan prezıdenti Ilham Álıevtiń, Túrkıa prezıdenti Rejep Erdoǵannyń aıaǵyn qushýǵa ázir turatynyn aıtylyp, bul áreketter Qazaqstannyń Armenıaǵa qarsy kóńil-kúıin bildiredi degen pikir jetkizilgen.
