2 qarasha túnde belgisiz adamdar Avstrıa astanasy Venanyń ortalyǵynda shabýyl jasamaq bolyp, oq atty. Saldarynan bir adam oqıǵa ornynda kóz jumyp, bir jábirlenýshi aýrýhanada qaıtys boldy jáne 15 adam jaraqat aldy. Shabýyldaýshynyń biri sonda mert bolsa, qalǵandary qashyp ketken. Bul týraly ria.ru saıty habarlady.

Qylmyskerlerdiń naqty sany men jeke quramy ázirge belgisiz. Bılik egjeı-tegjeıin jarıa etýden bas tartty, óıtkeni olardy izdeý operasıasy jalǵasyp jatyr. Vena turǵyndaryna úıde bolýǵa buıryq berildi. Avstrıa kansleri Sebastán Kýrs operasıa sozylatynyn aıtyp, azamattardy kóshege shyqpas buryn tańerteń sońǵy jańalyqtardy oqýǵa shaqyrdy. Jalpy alǵanda, polısıa men ishki ister mınıstrligi shabýyldardyń alty orny týraly habarlady. 

Oqıǵadan eki saǵat ótkennen keıin-aq Avstrıanyń ishki ister mınıstri Karl Nehammer oqıǵany terorıstik akt dep atady. Ol Venada úlken arnaıy operasıa júrgizilip jatqanyn aıtty.

Dúısenbi keshkisin Avstrıa astanasynyń ortalyǵynda birqatar shabýyldar boldy. Birinshiden, shamamen 20.00-de atys Saıtenshtátengasse kóshesinde bolǵan. Budan alys emes jerde sınagoga bar, sondyqtan alǵashqy habarlamalarda bul shabýyldaýshylardyń nysany bolǵany aıtylǵan, degenmen atalmysh aqparat áli senimdi túrde anyqtalmady. Ekstremıster belsendiligine monıtorıń jasaıtyn "SITE Intelligence Group" amerıkalyq agenttiktiń málimetinshe, Venadaǵy osy oqıǵaǵa jıhadshylardyń qatysy bar. 

Jaqynda Fransıada da terrakt bolǵan edi. El prezıdenti Emmanýel Makron Venadaǵy atys týraly jańalyqtarǵa qatysty twitter paraqshasynda pikir bildirgen.

–  Biz, fransýzdar, Venadaǵy shabýyldan keıin avstrıalyqtardyń kúızelisi men qaıǵysyna ortaqtasamyz. Fransıadan keıin dostas elge (Fransıa) shabýyl jasaldy. Bul – bizdiń Eýropa. Dushpandar kimmen alysyp jatqanyn bilýi kerek. Biz moıymaımyz jáne eshteńege jol bermeımiz, – dep jazdy Makron.