Qazaqstan prezıdenti Qasym-Jomart Toqaev Reseı prezıdenti Vladımır Pýtınmen telefon arqyly sóılesti. Bul týraly Aqorda saıty habarlady. 

Memleket basshylary Qazaqstan men Reseı arasyndaǵy yntymaqtastyqtyń ózekti máselelerin talqylap, eki eldiń halyqaralyq uıymdar men ıntegrasıalyq birlestikter sheńberindegi ózara yqpaldastyǵy týraly pikir almasqan.

Sondaı-aq Taýly Qarabaqtaǵy qalyptasqan jaǵdaıǵa erekshe nazar aýdarylǵan.

"Qasym-Jomart Toqaev Ázerbaıjan men Armenıanyń qaqtyǵys aımaǵyndaǵy soǵysty jáne barlyq áskerı qımyldardy toqtaý týraly kelisimge kelýinde Reseıdiń, sonyń ishinde, Vladımır Pýtınniń araaǵaıyndyq qyzmetin joǵary baǵalady.

– Reseıdiń belsendi aralasýymen osyǵan deıingi uzaq jyldarǵa sozylǵan qaqtyǵystardyń bir bitimge kelýin qamtamasyz etetin Taýly Qarabaqtaǵy soǵysty toqtatý týraly jasalǵan kelisimniń mańyzy zor. Múddeli taraptar Birlesken málimdemeniń sharttaryn saqtaıdy dep úmittenemin, – dedi Qasym-Jomart Toqaev.

Eki eldiń Prezıdentteri Qazaqstan men Reseı arasyndaǵy strategıalyq jáne odaqtastyq sıpatyndaǵy baılanystardy naqtylady" dep jazylǵan Aqorda saıtynda.