"Eger Djo Baıden resmı túrde 2020 jylǵy prezıdent saılaýynyń jeńimpazy dep jarıalansa, Donald Tramp 2024 jylǵy saılaýǵa qatysýdy oılastyrýda" dep habarlady AQSH aqparat agenttikteri.

Tramp keńesshilerine kelesi saılaýǵa qatysý nıeti bar ekenin aıtqany habarlandy. Bul týraly "Axios" jańalyqtar agenttigi birinshi bolyp Nú-Iork Taıms gazetine súıene otyryp habarlady.

"Saılaý aldyndaǵy alaıaqtyq aıyptaýlaryna baılanysty sotqa júginýge ýáde bergennen keıin Tramp 2024 jylǵy saılaýdaǵy kandıdatýrasy týraly óziniń oılaryn aıtty" dep habarlanǵan.

Ol "daýystardy shynaıy sanaý" bolǵanǵa deıin "tynym tappaıtynyn" aıtqan. Biraq táýelsiz baqylaýshylar keń aýqymdy alaıaqtyq týraly talaptardan bas tartqan.

Ótken aptada jarıalaǵan málimdemede Tramp "Biz Djo Baıdenniń nege ózin jeńimpaz retinde kórsetýge asyǵyp jatqanyn jáne onyń medıa odaqtastary oǵan kómektesýge tyrysyp jatqanyn bárimiz bilemiz: olar shyndyqtyń ashylǵanyn qalamaıdy" degen.

Sonymen qatar Tramp qyzmetten ketkennen keıin respýblıkashyldar partıasyna biraz yqpal etýin saqtap qalýǵa múmkindik beretin federaldyq qor jınaý organy – saıası is-qımyl komıtetin qurýdy josparlap otyr.

Tramp saılaý naýqanynyń ókili Tım Mýrtaý Nú-Iork Taıms gazetine bul komıtetti qurý jospary biraz ýaqyttan beri bolǵanyn aıtty.

Ol "Prezıdent jeńý nemese utylý jaǵdaıyn árdaıym josparlaıtyn, sondyqtan ol úmitkerlerdi qoldaı alady jáne alaıaqtarymen kúresý sıaqty mańyzdy máselelerdi sheshe alady" dedi.