Qazaqstandyq boksshy Tursynbaı Qulahmet birinshi orta salmaqtaǵy WBC International belbeýiniń ıegeri atandy. Bul týraly Sports.kz. habarlady.

Qazaqstandyq boksshy (1-0, 1 KO) Ońtústik Kırkbıde (Ulybrıtanıa) MTK Global promoýterlik kompanıasy uıymdastyrǵan kásipqoı boks keshinde birinshi orta salmaqtaǵy WBC International bos tıtýly úshin jergilikti boksshy Makleem Makgoýenmen (14-0-1, 3 KO) jekpe-jekke shyqty.  

Bul jekpe-jek on raýndqa jalǵasyp, tóreshilerdiń sheshimmen Tursynbaıdyń jeńisimen aıaqtalǵan (99-89, 99-89, 99-89). Jetinshi raýndta T.Qulahmet brıtandyq qarsylasyn nokdaýnǵa jiberdi. Osylaısha, ol óziniń mansabyndaǵy alǵashqy tıtýldy jeńip aldy. 

26 jastaǵy qazaqstandyq sportshy úshin bul óziniń kásibı mansabyndaǵy ekinshi jeńisi. Al onyń qarsylasy Makgoýen mansabyndaǵy alǵashqy jeńilis.

Tursynbaı Qulahmet 2019 jylǵy Azıa chempıony jáne 2019 jylǵy álem chempıonatynyń qola júldegeri bolǵan.