Búgin Almaty qalasyndaǵy Shoqan Ýálıhanov eskertkishiniń aldynda ruqsat etilgen mıtıń ótti. Mıtıńke Demokratıalyq partıa qurýǵa talpynyp júrgen qoǵam belsendisi Janbolat Mamaı men Youtube jelisindegi "Base" kanalynyń avtory Aıdos Sadyqov shaqyrdy. Uıymdastyrýshylar nesıe keshirilýin, jer satylmaýyn, saıası tutqyndardyń bosatylýyn talap etip, 10 qańtarǵa belgilengen májilis saılaýyna boıkot jarıalaýǵa shaqyrdy.

"Barlyq saıası tutqyndar bostandyqqa shyǵýy kerek. Memleket olardyń aldynda keshirim surap, ótemaqy tólesin, sebebi olar qylmysker emes" degen Janbolat Mamaı Jańaózen oqıǵasy men Jeltoqsan qurbandaryn eske alý maqsatynda 16 jeltoqsan kúni de jáne saılaý bolatyn 10 qańtar kúni de alańda mıtıńke jınalatynyn habarlady.

– Bılik 10 qańtar kúni ótirik májilis saılaýyn ótkizbek. Ol jerde eshqandaı tańdaý joq, eshqandaı saıası partıa joq. NurOtan partıasy jáne qalǵany sonyń bólimsheleri sıaqty. Bılik qalaı aıtady, solaı bolady. Sol úshin bizdiń sózimiz anyq bolýy kerek. Biz mundaı saılaýǵa qatyspaımyz. Parlament saılaýyna boıkot! Qazaqstanǵa saıası reforma, saıası ózgerister kerek. Olaı jasamasa, Nazarbaev ta, Toqaev ta ketsin. Nazarbaevtyń 30 jyldyq bıliginen sharshadyq. Sózimizdi úkimet estimese, bizde alańǵa shyǵýdan basqa amal joq. Alańǵa shyǵyp, talap qoıatyn kez keldi, – dedi Janbolat Mamaı.