XX sıez qarsańynda partıanyń Ortalyq apparatynda «Nur Otan» Saıası keńesiniń otyrysy ótti. Beınekonferensıa baılanysy rejıminde uıymdastyrý máselelerimen qatar partıanyń sońǵy 5 jyldaǵy qyzmetiniń qorytyndylary qaraldy.

«Nur Otan»-nyń besjyldyq jumysyn qorytyndylaı kele, partıa Tóraǵasynyń birinshi orynbasary Baýyrjan Baıbek partıanyń 234 qoǵamdyq qabyldaý bólmesi saılaýaldy baǵdarlamany baqylaý men «keri baılanystyń» pármendi tetigi bolǵanyn atap ótti.

Elbasy, partıa Lıderi Nursultan Nazarbaevtyń tapsyrmasy boıynsha «Nur Otan» 2014 jyly elimizde birinshi bolyp «Elektrondy partıa» jobasy aıasynda qoǵamdyq onlaın-qabyldaý bólmesin, veb-portal ashyp, messendjerler men áleýmettik jeliler arqyly komýnıkasıanyń jańa arnalaryn engize bastady.

«5 jyl ishinde partıaǵa shamamen 1,2 mln. adam júgindi, onyń 30%-i ótinishterin onlaın joldady. Ótinishterdiń 92%-i boıynsha oń sheshim qabyldanyp, tegin keńes berilip, quqyqtyq kómek kórsetildi. Nurotandyq depýtattar, ortalyq jáne jergilikti atqarýshy organdardyń basshylary 180 myńǵa jýyq qabyldaý ótkizip, 340 myńnan astam azamatty qabyldady. Ótinishterdiń 72%-i oń sheshimin tapty, 28%-i boıynsha túsindirmeler men qajetti keńester berildi», - dedi Baýyrjan Baıbek.

Onyń aıtýynsha, pandemıaǵa qaramastan, qoǵamdyq qabyldaýlardyń jumysy onlaın formatta jalǵasyp, elektrondy túrde 339 myń ótinish qabyldanǵan.

«Álemdik tájirıbe kórsetkendeı, pandemıa kezinde turmystyq zorlyq-zombylyq ósýde. Qıyn-qystaý jaǵdaıǵa tap bolǵan otbasylarǵa, áıelder men balalarǵa keshendi kómek kórsetýdi uıymdastyrý úshin táýlik boıy jumys isteıtin «111 shuǵyl qyzmet» baılanys ortalyǵy iske qosyldy. 2 aıdyń ishinde 3 myńnan astam ótinish boıynsha zań keńesteri berilip, psıhologıalyq kómek kórsetildi. Bul – el Prezıdenti Qasym-Jomart Kemeluly Toqaevtyń «Halyq únine qulaq asatyn memleket» tujyrymdamasyn júıeli júzege asyrýdyń kórinisi», - dedi partıa Tóraǵasynyń birinshi orynbasary.

Osy oraıda, ol Elbasy, partıa Tóraǵasy Nursultan Nazarbaevtyń tapsyrmasyna sáıkes, «Nur Otan» partıasy naqty áleýmettik toptardyń máselelerin jobalyq tásil negizinde sheshetinin atap ótti.

Máselen, «Ardagerlerdi ardaqtaıyq» jobasyn júzege asyra otyryp, ardagerler men tyl eńbekkerleriniń 200 myńnan astam áleýmettik-turmystyq máseleleri sheshildi. «Baqytty otbasy» jobasy aıasynda 1300-den astam bilim berý, densaýlyq saqtaý jáne áleýmettik qorǵaý mekemelerine monıtorıń júrgizildi, bala quqyqtaryn qorǵaý jáne turmystyq zorlyq-zombylyqqa qarsy turý turǵysynan zań jobalaryna 45 usynys engizildi.

«Kedergisiz keleshek» jobasynyń arqasynda erekshe qajettilikteri bar 40 myńǵa jýyq azamat jumysqa ornalastyrylyp, 24 myńnan astam nysan solarǵa yńǵaılandyryldy. Sondaı-aq, jalpy bilim beretin mektepterde 43 ınklúzıany qoldaý kabıneti ashyldy.

«Elbasy, partıa Lıderi N.Á. Nazarbaev qoıǵan mindetterdiń sheshilýin, alynǵan mindettemelerdiń oryndalýyn baqylaýdy Partıalyq baqylaý komıteti men Sybaılas jemqorlyqqa qarsy is-qımyl jónindegi respýblıkalyq qoǵamdyq keńes iske asyrady. Sońǵy 5 jyl ishinde partıalyq basty organdar túrli memlekettik jáne partıalyq organdarǵa 800-den astam usynym ázirledi. Máselen, Partıalyq baqylaý komıtetiniń aralasýymen 9,3 myń medısına qyzmetkerine ótemaqy tólendi», – dep atap ótti Baýyrjan Baıbek.

Sybaılas jemqorlyqqa qarsy kúres te partıa úshin prınsıpti másele bolyp qala beredi. Sybaılas jemqorlyqqa qarsy is-qımyl jónindegi respýblıkalyq keńes «Jas Otan» Jastar qanatymen birlesip joǵary oqý oryndary men kolejderdi tekserdi. Nátıjesinde 10 myńnan astam stýdenttiń jataqhanalardaǵy ómir súrý jaǵdaıy jaqsardy.

«Jastar – Otanǵa!» baǵdarlamasy aıasynda sońǵy 5 jylda 13 myńnan astam jas býyn jumysqa turdy. Jastar bastamalarynyń memlekettik áleýmettik tapsyrysyn qarjylandyrý 2,5 ese ósti.

«Nur Otan» partıasy qoǵamdyq-saıası uıymdardyń ishinen alǵashqylardyń biri bolyp pandemıanyń áleýmettik-ekonomıkalyq saldaryna qarsy turdy. Elbasy, «Nur Otan» partıasy Tóraǵasynyń bastamasymen qurylǵan «Birgemiz» qoǵamdyq qory 2,2 mılıonnan astam adamǵa, Nur-Sultan men Almaty qalasyndaǵy 2 myńnan astam medısına qyzmetkerine materıaldyq kómek kórsetti. Halyqtyń neǵurlym az qorǵalǵan toptaryna jatatyn 100 myń otbasyna 5 mln. medısınalyq maska tegin taratyldy. 1 mln-nan astam adam 4,4 mlrd. teńge somaǵa birinshi kezekte qajetti taýarlarmen qamtamasyz etildi. Maqtaaralda sý tasqynynan zardap shekken azamattarǵa arnap 32 úı salynyp, 1 myń tonnadan astam gýmanıtarlyq kómek jiberildi», - dedi Baýyrjan Baıbek.

Baýyrjan Baıbektiń aıtýynsha, pandemıa men kúrdeli ekonomıkalyq ahýalǵa qaramastan, partıa belsendi jumys júrgizdi, óziniń barlyq áleýmettik saılaýaldy mindettemelerin oryndady jáne saılaýshylardyń senimin nyǵaıtty.

Ashyqtyq pen eseptilik qaǵıdattaryn basshylyqqa ala otyryp, «Nur Otan» 2014 jyldan bastap jyl saıyn BAQ-ta shyǵystardyń barlyq baptaryn kórsete otyryp, qarjylyq esebin jarıalap keledi. Partıa bastamasymen Esep komıteti eki ret tekserý júrgizip, barlyǵy qoldanystaǵy zańnamaǵa sáıkes keletinin anyqtady.

«Kóshbasshylyqty saqtaý úshin ýaqyt talabyna jaýap bere otyryp, ózgerý qajet. Elbasy aıtqandaı, «Nur Otan» odan ári damýdy jalǵastyra berýi tıis. Sondyqtan ótken jyly partıa basshysynyń tapsyrmasymen «Senim. Dıalog. Bolashaqqa nyq qadam» atty partıany qaıta jandandyrý baǵdarlamasy qabyldandy. Bıliktiń barlyq deńgeıinde partıalyq jaýapkershilikti arttyrýǵa baılanysty sharalar qolǵa alynyp, partıanyń Májilistegi jáne máslıhattardaǵy depýtattyq fraksıalarynyń jumysy jandandyryldy. «Partıa qataryn tazartý» aıasynda Jarǵy men Etıka kodeksin saqtamaǵany, partıamen baılanysty joǵaltqany úshin 240 myńnan astam adam, sybaılas jemqorlyq quqyq buzýshylyǵy úshin 610 adam partıadan shyǵaryldy. Óz kezeginde «Nur Otan» praımerızi elimiz úshin eleýli saıası oqıǵaǵa aınalyp, is júzinde «Myqty lıderler – Myqty partıa» formýlasyn iske asyrdy», - dep qorytyndylady jetekshi partıa Tóraǵasynyń birinshi orynbasary.

Saıası Keńes otyrysy barysynda Pavlodar oblysynan jas ǵalym Irına Chıdýnchı partıaishilik saılaýǵa qatysty pikirimen bólisti.
«Barlyq pavlodarlyq áıelder atynan Elbasymyzǵa aýqymdy jobaǵa qatysýǵa múmkindik bergeni úshin alǵysymdy bildirip, eldegi bolyp jatqan ózgeristerden syrt qalmaıtynymyzǵa, Qazaqstandy birge órkendetý úshin barlyq kúsh-jigerimizdi jumsaıtynymyzǵa sendirgim keledi», - dedi I.Chıdýnchı.

Túrkistan oblysynan praımerızge qatysqan Bekarys Shoıbekovtyń aıtýynsha, bıylǵy praımerız qarapaıym azamattardyń saıasatqa aralasýyna jol ashyp, qoǵam tarapynan joǵary baǵalanǵan.

«Búgin «Nur Otan» partıasy óz jumysyna jańa format engizdi, ony kórip otyrmyz. Tuńǵysh ret respýblıkalyq aýqymda praımerız ótkizildi. Sondaı-aq, árbir óńir, qala jáne aýdan boıynsha daıyndalǵan 216 saılaýaldy baǵdarlama halyq arasynda jan-jaqty talqylandy. Bunyń barlyǵy – Elbasy, partıa Tóraǵasy N.Á.Nazarbaevtyń partıany «qaıta jandandyrý» jónindegi bastamasynyń arqasynda júzege asty. «Nur Otan» naǵyz halyqtyq partıa ekenin dáleldedi, - dedi Saıası keńes múshesi Baqytjan Jumaǵulov.

Saıası keńes otyrysynyń qorytyndysy boıynsha Úkimettiń saılaýaldy baǵdarlamasyn iske asyrý jónindegi esebi aldyn ala maquldandy, partıanyń Jarǵysy men Saıası Doktrınasyna ózgerister qaraldy. Praımerızdiń 78 jeńimpazy engen Májiliske arnalǵan partıalyq tizim, sondaı-aq jumys organdarynyń quramy men partıanyń kezekten tys XX Seziniń kún tártibi bekitildi.

«Nur Otan» partıasynyń baspasóz qyzmeti