Armenıa premer-mınıstri Nıkol Pashınán úsh kún qatarynan kásipkerlermen eldegi ekonomıkalyq jáne ınvestısıalyq qyzmetti qalpyna keltirý máselelerin talqylap jatyr. Bul týraly armeniasputnik.am saıty habarlady.

Úkimettiń baspasóz qyzmetiniń habarlaýynsha, sársenbide Pashınán "Elseti Armenia" kompanıasynyń bas dırektory Karen Arýtúnánmen, "Gazprom Armenıa" basshysy Hrant Tadevosánmen, "Renshın"  qurylys jáne ınvestısıalyq uıymynyń dırektory Nýshıkánmen kezdesken.

– Úkimet pen iskerlik orta arasyndaǵy baılanysty nyǵaıtý, ınvestısıalyq baǵdarlamalardy júzege asyrýdy jalǵastyrý, ekonomıkalyq optımızmdi qalpyna keltirý máseleleri talqylandy. Naqty kelisimderge qol jetkizildi, – delingen habarlamada.

Basylymnyń habarlaýynsha, premer-mınıstrler kásipkerlermen kezdesý ótkizip, eldegi ahýaldy jaqsartýdyń amalyn izdep júrgende, búgin (25 qarasha) Erevandaǵy Ulttyq ǵylym akademıasynyń prezıdıýmy onyń otstavkaǵa ketýin talap etip, málimdeme jasaǵan.

Ulttyq ǵylym akademıasy Qarabaqqa qatysty sheshimdi, ıaǵnı úshjaqty málimdemeni armán halqy úshin "masqara" dep sanaıdy.

Sonymen qatar búgin Erevannyń ortalyǵyndaǵy Armenıa úkimeti ǵımaratynyń janynda  "Dashnaksýtún" saıası partıasynyń ókili Gegam Manýkán men Konstıtýsıalyq sottyń eks-sýdásy Kım Balaıan ashtyq jarıalady. Olar Armenıadaǵy turaqtylyqty qalpyna keltirý jáne Pashınánnyń otstavkaǵa ketýintalap etti.

Armenıa Ulttyq qaýipsizdik qyzmetiniń burynǵy dırektory, "Otan" partıasynyń jetekshisi Artýr Vanesán jýrnalıserge Pashınánnyń qyzmetinen ketýin kópshilik qalaıtynyn málimdegen.

Buǵan deıin Armenıa premer-mınıstri Nıkol Pashınán Ázerbaıjan prezıdenti Ilham Álıev jáne Reseı prezıdenti Vladımır Pýtın Taýly Qarabaqta áskerı áreketterdi toqtatý týraly kelisimge qol qoıǵan. Osylaısha úsh eldiń arasynda bolǵan kelisim boıynsha 3 aýdan Ázerbaıjanǵa qaıtarylyp, basqynshy ásker aımaqtan shyǵarylady. Bul kelisimnen keıin Armenıa astanasy Erevanda premer-mınıstrge qarsy mıtıńter ótip, sodan beri halyq Pashınánnyń otstavkaǵa ketýin talap etip keledi.