Kvazımemlekettik sektor sýbektilerin qurýǵa jarıalanǵan moratorıı uzartylady. Bul týraly prezıdent Qasym-Jomart Toqaev "Altyn sapa" konkýrsynyń jeńimpazdaryn marapattaýǵa arnalǵan onlaın sharada aıtty. 

Memleket basshysy pandemıa men álemdik ekonomıkalyq daǵdarysqa qaramastan, 11 aıdyń qorytyndysy boıynsha óńdeý ónerkásibindegi ósim 3,3 prosent deńgeıinde saqtalyp otyrǵanyn erekshe atap ótti.

– Bıylǵy 1 qańtardan bastap meniń Jarlyǵymmen shaǵyn jáne mıkro kásipkerlik sýbektilerin tekserýge aldaǵy úsh jylǵa moratorıı engizildi. Meniń tapsyrmam boıynsha Úkimet pen Ulttyq palata retteý saıasatynyń jańa ádisterin ázirleýge kirisip ketti. Kelesi jyldan bastap qazirgi talaptardy qaıta qaraý jáne «jańadan retteý» qaǵıdatyn engizý jónindegi zańnamalyq normalar birtindep qabyldanatyn bolady. Bul bıznesti «aqyldy retteýdiń» túbegeıli jańa júıesin qalyptastyra otyryp, mańyzdy emes erejeler men qaıtalanatyn talaptardy alyp tastaýǵa múmkindik beredi, – dedi Qasym-Jomart Toqaev.   

Prezıdent ekonomıkany memleket menshiginen odan ári alý isi naqty básekelestikti damytýda jáne ár kásipkerge shyn máninde teń múmkindik berýde mańyzdy ról atqaratynyn aıtty.

– Biz memlekettiń ekonomıkaǵa aralasý úlesin aıtarlyqtaı azaıtý úshin birtindep jaǵdaı jasaımyz. Bıyl kvazımemlekettik sektor sýbektilerin qurýǵa jarıalanǵan moratorıı aıaqtalady. Bul baǵyttaǵy maqsatqa áli tolyq qol jetkizilgen joq dep sanaımyn. Sondyqtan meniń Jarlyǵymmen atalǵan moratorıı kelesi jyldyń aıaǵyna deıin sozylady. Memleket ońtaıly bıznes orta qalyptastyrýdan bólek, elimizdegi kásipkerlikti jan-jaqty damytý úshin júıeli sharalar qabyldamaq, – dedi memleket basshysy.

Memleket basshysy pandemıa kezinde bıznes nesıelerdi qaıtarý merzimin shegerýge múmkindik alǵanyn jáne salyqtan bosatylyp, basqa da jeńildikter men artyqshylyqtarǵa ıe bolǵanyn atap ótti. Kórsetilgen qoldaýdyń jalpy kólemi 1,5 trıllıon teńgeden asqan.